ممبئی( شو بز ڈیسک)بالی ووڈ کی معروف اداکارہ کترینہ کیف کی شوبز دنیا میں واپسی سے متعلق گردش کرنے والی خبروں پر آخرکار وضاحت سامنے آ گئی ہے۔بھارتی ذرائع ابلاغ کے مطابق اداکارہ کی سرکاری نمائندہ ٹیم نے ان اطلاعات کو مسترد کر دیا ہے جن میں دعویٰ کیا جا رہا تھا کہ کترینہ کیف 2027ء میں دوبارہ اداکاری کے میدان میں سرگرم ہونے کا ارادہ رکھتی ہیں۔رپورٹس میں یہ بھی کہا گیا تھا کہ اداکارہ اپنی نئی فنی سرگرمیوں کا آغاز ایک آن لائن نشریاتی پلیٹ فارم کے ذریعے کریں گی، تاہم ان کی ٹیم نے ان تمام دعوؤں کو بے بنیاد اور محض قیاس آرائی قرار دیا ہے۔وضاحتی بیان میں کہا گیا ہے کہ کترینہ کیف کی واپسی سے متعلق اس وقت کوئی باضابطہ منصوبہ یا اعلان موجود نہیں، لہٰذا گردش کرنے والی خبروں میں صداقت نہیں۔یاد رہے کہ کترینہ کیف کو آخری مرتبہ جنوری 2024ء میں ریلیز ہونے والی سنسنی خیز فلم ’’میری کرسمس‘‘ میں دیکھا گیا تھا۔گزشتہ برس نومبر میں کترینہ کیف اور ان کے شوہر وکی کوشل کے ہاں پہلے بیٹے کی پیدائش ہوئی تھی، جس کے باعث اداکارہ نے کچھ عرصے کے لیے اپنے فنی مصروفیات سے وقفہ اختیار کر لیا تھا۔واضح رہے کہ کترینہ کیف اور وکی کوشل نے 9 دسمبر 2021ء کو راجستھان میں ایک شاندار تقریب کے دوران شادی کی تھی، جس میں خاندان اور قریبی دوستوں نے شرکت کی تھی
