صدرِ مملکت آصف علی زرداری اور وزیراعظم شہباز شریف نے بلوچستان کے ضلع خضدار کے علاقے نال میں خفیہ اطلاعات پر مبنی کارروائی میں بھارتی سرپرستی میں سرگرم فتنہ الہندوستان کے 14 دہشتگردوں کو ہلاک کرنے پر سکیورٹی فورسز کو خراجِ تحسین پیش کیا ہے۔
اپنے پیغام میں صدرِ مملکت نے لانس حوالدار محمد عباس کی شہادت پر گہرے رنج و غم کا اظہار کرتے ہوئے کہا کہ وطنِ عزیز کے بہادر سپوتوں کی قربانیاں رائیگاں نہیں جائیں گی۔
انہوں نے کہا کہ بروقت اور مؤثر کارروائی کے نتیجے میں دہشت گردوں کے مذموم عزائم ناکام بنانا ریاستی اداروں کی پیشہ ورانہ صلاحیت اور قومی عزم کا مظہر ہے۔
صدرِ مملکت نے سکیورٹی فورسز کی جرات اور قربانی کو سراہتے ہوئے کہا کہ ملک دشمن عناصر کے خلاف کارروائیاں قومی سلامتی کے تحفظ کی ضمانت ہیں۔
ادھر وزیراعظم شہباز شریف نے اس کارروائی کے دوران دہشت گردوں کا بھرپور مقابلہ کرتے ہوئے جام شہادت نوش کرنے والے پاک فوج کے لانس حوالدار محمد عباس کو خراج عقیدت پیش کیا۔
وزیراعظم نے شہید محمد عباس کی بلندیٔ درجات کی دعا اور ان کے اہل خانہ سے اظہار تعزیت کیا۔
انہوں نے کہا کہ عزم استحکام کے ویژن کے تحت سکیورٹی فورسز دہشت گردی کے خلاف بڑی کامیابیاں حاصل کر رہی ہیں۔
شہباز شریف نے کہا کہ ملک سے ہر قسم کی دہشت گردی کے مکمل خاتمے کے لئے پُرعزم ہیں۔