کراچی( شو بز ڈیسک)پاکستانی شوبز کے سینئر اداکار اور ہدایت کار سمیع ثانی ان دنوں سماجی رابطوں کی ویب گاہوں پر اپنی مختصر ویڈیوز کی مقبولیت کے باعث توجہ کا مرکز بنے ہوئے ہیں۔نوّے کی دہائی میں اپنی منفرد اداکاری سے شہرت حاصل کرنے والے سمیع ثانی نے بعد ازاں ہدایت کاری کے شعبے میں بھی نمایاں کامیابیاں سمیٹیں۔ حالیہ دنوں میں ان کی ویڈیوز مقبول ہونے کے بعد مداحوں نے ان کے فنی سفر اور اداکاری سے متعلق مختلف سوالات اٹھائے۔ایک ویڈیو گفتگو میں سمیع ثانی نے مداحوں کے سوالات کے جواب دیتے ہوئے کہا کہ وہ خود کو کامیاب شخص نہیں سمجھتے۔ ان کے مطابق اصل کامیابی اللہ تعالیٰ کی عطا ہے، البتہ انہیں اداکاری کے میدان میں عوام کی بھرپور پذیرائی حاصل ہوئی، جس کی وجہ سے وہ طویل عرصے تک اس شعبے سے وابستہ رہے۔اداکاری سے فاصلے کی وجہ بیان کرتے ہوئے انہوں نے کہا کہ ان کی طبیعت ایک ہی کام کو طویل عرصے تک جاری رکھنے کی عادی نہیں۔ وہ نئے تجربات کرنا پسند کرتے ہیں اور اسی جستجو نے انہیں مختلف شعبوں میں کام کرنے کی ترغیب دی۔سمیع ثانی کا کہنا تھا کہ زندگی مسلسل آگے بڑھنے کا نام ہے اور انسان مکمل اطمینان کی کیفیت تک نہیں پہنچ سکتا۔ انہوں نے بتایا کہ نہ تو اداکاری اور نہ ہی ہدایت کاری کی باقاعدہ تعلیم حاصل کی، بلکہ مواقع اور تجربات سے سیکھتے ہوئے آگے بڑھتے رہے۔انہوں نے واضح کیا کہ انہوں نے اداکاری ترک نہیں کی بلکہ فی الحال ہدایت کاری پر توجہ دے رہے ہیں۔ ان کے بقول ناظرین انہیں جلد دوبارہ اداکاری کرتے دیکھیں گے۔ انہوں نے حالیہ عرصے میں کئی ڈرامے ہدایت کیے ہیں جو مختلف ٹیلی وژن چینلز پر نشر ہو رہے ہیں۔سمیع ثانی نے مزید کہا کہ مسلسل مصروفیات کے باعث وہ کچھ تھکن محسوس کر رہے تھے، اسی لیے انہوں نے مختصر وقفہ لینے کا فیصلہ کیا ہے۔
