طوبیٰ انور نے والدین کے ساتھ حج کی سعادت کو زندگی کا انمول لمحہ قرار دے دیا

 کراچی :معروف اداکارہ طوبیٰ انور نے اپنے والدین کے ہمراہ حج کی ادائیگی کے بعد اس روح پرور سفر کی یادگار جھلکیاں اور جذباتی احساسات مداحوں کے ساتھ شیئر کیے ہیں۔ انہوں نے اس مقدس سفر کو اپنی زندگی کے سب سے بابرکت اور معنی خیز تجربات میں سے ایک قرار دیا۔سماجی رابطے کی ویب گاہ پر تصاویر شیئر کرتے ہوئے طوبیٰ انور نے بتایا کہ انہیں اپنی والدہ اور والد کے ساتھ حج کی سعادت حاصل ہوئی، جس پر وہ اللہ تعالیٰ کا بے حد شکر ادا کرتی ہیں۔ انہوں نے لکھا کہ وہ خود کو خوش نصیب سمجھتی ہیں کہ یہ روحانی سفر اپنے سب سے قریبی ساتھیوں، یعنی اپنے والدین کے ساتھ طے کرنے کا موقع ملا۔اداکارہ کا کہنا تھا کہ حج انسان کی زندگی میں ایسی مثبت تبدیلی لے آتا ہے جسے الفاظ میں مکمل طور پر بیان کرنا ممکن نہیں۔ ان کے مطابق یہ سفر انسان کے دل و روح کی ٹوٹ پھوٹ کو جوڑ دیتا ہے اور اسے ایک نئی کیفیت سے آشنا کرتا ہے۔انہوں نے مزید لکھا کہ اگرچہ یہ چند دنوں کا سفر تھا، لیکن انہیں یوں محسوس ہوا جیسے ایک مکمل زندگی گزر گئی ہو۔ اس دوران انسان بہت سی غیر ضروری وابستگیوں کو پیچھے چھوڑ دیتا ہے اور وہ سکون حاصل کرتا ہے جس کی اس کی روح کو حقیقی ضرورت ہوتی ہے۔طوبیٰ انور نے اس سفر کو ایک معجزاتی داستان قرار دیتے ہوئے کہا کہ اس سعادت تک پہنچنے کی اپنی ایک منفرد کہانی ہے، جسے وہ کسی مناسب موقع پر بیان کریں گی۔ فی الحال ان کے دل میں صرف شکرگزاری کے جذبات ہیں۔اپنے پیغام کے اختتام پر اداکارہ نے حج کی قبولیت کی دعا کی اور بتایا کہ وہ فریضۂ حج کی ادائیگی کے بعد مدینہ منورہ روانہ ہو چکی ہیں۔ ان کی اس پوسٹ پر مداحوں اور فنونِ لطیفہ سے وابستہ شخصیات کی جانب سے مبارک باد، نیک تمناؤں اور دعاؤں کا سلسلہ جاری ہے