واشک میں سیکیورٹی فورسز کی بڑی کارروائی، 5 دہشت گرد مارے گئے

**واشک (14 اکتوبر، 2026):** بلوچستان کے ضلع واشک میں سیکیورٹی فورسز نے انٹیلی جنس بنیادوں پر کامیاب کارروائی کرتے ہوئے ’فتنہ الہندوستان‘ کے 5 دہشت گردوں کو جہنم واصل کر دیا جبکہ فائرنگ کے تبادلے میں 4 زخمی ہو گئے۔

سیکیورٹی ذرائع کے مطابق آپریشن ردالفتنہ 3 کے تحت فورسز نے واشک کے علاقے پلانتک میں دہشت گردوں کی موجودگی کی خفیہ اطلاع پر اچانک چھاپا مارا۔ کارروائی کے دوران جدید ہتھیاروں سے لیس فورسز نے شدت پسندوں کے خفیہ ٹھکانوں کو نشانہ بنایا، جس کے نتیجے میں 5 دہشت گرد موقع پر مارے گئے جبکہ ان کے 4 ساتھی شدید زخمی ہو گئے۔

ذرائع کے مطابق کارروائی کے بعد سرچ آپریشن کے دوران دہشت گردوں کے قبضے سے آر پی جی سیون، 5 گولے، میگزینز سمیت 5 جدید ہتھیار، 3 موبائل فونز اور 2 موٹر سائیکلیں برآمد کر لی گئیں۔

سیکیورٹی ذرائع کا کہنا ہے کہ ہلاک اور زخمی ہونے والے دہشت گرد بلوچ عوام کو لوٹنے، علاقے میں خوف و ہراس پھیلانے اور قومی انفراسٹرکچر کو نقصان پہنچانے کی سنگین وارداتوں میں ملوث تھے۔

حکام کا کہنا ہے کہ سیکیورٹی فورسز بلوچستان سے دہشت گردی کے مکمل خاتمے کے لیے پرعزم ہیں اور صوبے میں آخری دہشت گرد کے خاتمے تک یہ ٹارگٹڈ کارروائیاں بلا تعطل جاری رہیں گی۔