حرمین شریفین کا تحفظ اولین ترجیح، کوئی سمجھوتہ نہیں ہوگا: ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے واضح کیا ہے کہ سعودی عرب کی خودمختاری، علاقائی سالمیت اور خصوصاً حرمین شریفین کا تحفظ پاکستان کے لیے اولین ترجیح ہے جس پر کسی قسم کا سمجھوتہ نہیں کیا جا سکتا۔

انڈیپنڈنٹ عربیہ کو دیے گئے ایک خصوصی انٹرویو میں ڈی جی آئی ایس پی آر نے کہا کہ اس معاملے پر پاکستان کا مؤقف دوٹوک اور غیر مبہم ہے، جبکہ پاکستان کا واضح پیغام ملکی سیاسی قیادت اور فیلڈ مارشل کے توسط سے پہلے ہی باضابطہ طور پر سامنے آ چکا ہے۔ انہوں نے کہا کہ سعودی عرب میں مقدس مقامات کو نشانہ بنانے کی کوششوں پر پاکستانی عوام سمیت سیاسی اور عسکری قیادت میں شدید غم و غصہ پایا جاتا ہے۔

مشرقِ وسطیٰ کی مجموعی صورتحال پر گفتگو کرتے ہوئے ترجمان پاک فوج نے کہا کہ عسکری تنازع کو مزید طول دینا کسی بھی فریق کے مفاد میں نہیں اور کشیدگی بڑھانے سے کسی ملک کو کوئی فائدہ حاصل نہیں ہوگا، لہٰذا پرامن مذاکرات کے ذریعے حل تلاش کرنا ناگزیر ہے۔ انہوں نے متنبہ کیا کہ اگر مذاکراتی عمل ناکام رہا اور فوجی تصادم کی نوبت آئی تو ’مکہ الائنس‘ کا اجتماعی دفاعی نظام (ڈیٹرنس) یقیناً حرکت میں آئے گا۔

لیفٹیننٹ جنرل احمد شریف چوہدری نے واضح کیا کہ مکہ الائنس کی حکمتِ عملی اور قیادت کا لائحہ عمل بالکل واضح ہے اور اس کا کوئی بھی جارحانہ ارادہ نہیں۔ یہ اتحاد کسی مخصوص ملک کے خلاف نہیں بلکہ اس کا بنیادی مقصد خطے میں پائیدار امن، استحکام اور سلامتی کو یقینی بنانا ہے۔ انہوں نے مزید کہا کہ پاکستان، سعودی عرب اور ترکیہ خطے کے عوام کی خوشحالی اور امن کے لیے پرعزم ہیں، اس لیے امت مسلمہ کو باہمی تنازعات میں الجھنے کے بجائے باہم متحد ہونا چاہیے۔