بلوچستان کی تاریخ میں پہلی بار ای-ڈومیسائل اور ای-لوکل سرٹیفکیٹ سسٹم متعارف
بلوچستان کی تاریخ میں پہلی بار ای-ڈومیسائل اور ای-لوکل سرٹیفکیٹ سسٹم متعارف
: ای-ڈومیسائل سسٹم گڈ گورننس اور شفاف عوامی خدمات کی جانب اہم سنگِ میل ہے، وزیر اعلیٰ سرفراز بگٹی
کوئٹہ: وزیر اعلیٰ بلوچستان میر سرفراز بگٹی نے صوبے کی تاریخ میں پہلی بار جدید ڈیجیٹل اصلاحات کے تحت ای-ڈومیسائل اور ای-لوکل سرٹیفکیٹ سسٹم کا باضابطہ افتتاح کر دیا ہے۔ انہوں نے اس اقدام کو گڈ گورننس، شفافیت اور عوام دوست خدمات کی فراہمی کے لیے ایک انقلابی قدم قرار دیا ہے۔
اس جدید نظام کے نفاذ سے روایتی دفتری نظام اور طویل انتظار کا خاتمہ ہوگا، جبکہ شہری اب انتہائی آسان طریقے سے اپنی رہائشی دستاویزات حاصل کر سکیں گے۔
:نادرا اور Pak-ID پلیٹ فارم کے ذریعے ملک بھر سے رسائی ممکن
وزیر اعلیٰ میر سرفراز بگٹی کے مطابق، اس سسٹم کو قومی شناختی ڈیٹا بیس سے منسلک کر دیا گیا ہے تاکہ بیرونِ صوبہ مقیم شہری بھی اس سہولت سے یکساں فائدہ اٹھا سکیں۔
جدید ای-ڈومیسائل نظام کے نمایاں فوائد:
آسان طریقہ کار: شہری پاکستان بھر میں قائم نادرا سینٹرز، ڈپٹی کمشنر دفاتر اور آن لائن Pak-ID پلیٹ فارم کے ذریعے ای-ڈومیسائل کے لیے درخواست دے سکتے ہیں۔
جعلی دستاویزات کا خاتمہ: یہ نظام جعلی اور دوہرے ڈومیسائل کے دیرینہ مینیوئل مسئلے کو جڑ سے ختم کر کے میرٹ کی بالادستی یقینی بنائے گا۔
محفوظ تصدیق: سرکاری اداروں کے لیے اب کسی بھی ڈومیسائل کی فوری اور سو فیصد قابلِ اعتماد آن لائن تصدیق کرنا ممکن ہوگا۔
عوامی خدمات کو جدید بنانے کا پختہ عزم
میر سرفراز بگٹی نے واضح کیا کہ صوبائی حکومت بلوچستان کے عوام کو تیز رفتار، آسان اور مؤثر خدمات کی فراہمی کے اپنے عزم پر سختی سے قائم ہے۔ انہوں نے کہا کہ ڈیجیٹل اصلاحات کا یہ سفر صوبے کے دور دراز علاقوں تک پھیلا کر عوام کی محرومیوں کا ازالہ کیا جائے گا