طالبان رجیم کی غیر جمہوری پالیسیاں اور انسانی حقوق کی ورزیاں: افغانستان عالمی سطح پر تنہائی کا شکار
اسلام آباد (ویب ڈیسک)افغان طالبان کی انتہا پسندانہ پالیسیوں، پُرتشدد اقدامات اور انسانی حقوق کی مسلسل پامالیوں کے باعث افغانستان عالمی سطح پر شدید سفارتی تنہائی کا شکار ہو چکا ہے۔ طالبان اقتدار میں آنے کے بعد سے اب تک دنیا کے کسی بھی ملک نے ان کی حکومت کو باضابطہ طور پر تسلیم نہیں کیا، جبکہ امریکی پالیسی سازوں نے افغانستان کو اپنی اہم ترجیحات کی فہرست سے مکمل طور پر خارج کر دیا ہے۔
'دی ڈپلومیٹ' کے سنسنی خیز انکشافات
معروف عالمی جریدے 'دی ڈپلومیٹ' کی تازہ رپورٹ کے مطابق، 2021 میں افغانستان سے امریکی انخلا کے بعد سے واشنگٹن نے طالبان رجیم کو بطور جائز حکومت تسلیم کرنے سے مکمل انکار کر رکھا ہے۔
عالمی جریدے کی رپورٹ کے اہم نکات:
سفارتی سرگرمیوں کی معطلی: 31 اگست 2021 سے کابل میں امریکی سفارت خانے کا کام مکمل طور پر بند ہے۔
مالی امداد کا خاتمہ: امریکی انتظامیہ نے 2025 کے وسط سے افغانستان کے لیے تمام تر مالی اور انسانی امداد معطل کر دی ہے۔
ویزا سروسز کی بندش: افغان شہریوں کے لیے اسپیشل امیگرنٹ ویزا (SIV) سمیت تمام اقسام کے امریکی ویزوں کا اجرا روک دیا گیا ہے۔
یرغمال سفارت کاری اور امریکی سلامتی حکمتِ عملی سے اخراج
رپورٹ کے مطابق طالبان کی جانب سے امریکی شہریوں کی گرفتاریوں کو واشنگٹن نے "یرغمال سفارت کاری" (Hostage Diplomacy) قرار دیا ہے۔ اس کے نتیجے میں امریکہ نے افغانستان کو اپنی نیشنل سیکیورٹی اسٹریٹیجی 2025 اور نیشنل ڈیفنس اسٹریٹیجی 2026 دونوں سے بالکلیہ خارج کر دیا ہے۔
ناکام ریاست کا درجہ: عالمی پالیسی ساز اب افغانستان کو ایک ناکام ریاست اور ماضی کا باب تصور کر رہے ہیں۔
امریکی سفیر کا سخت موقف: اقوامِ متحدہ میں امریکی سفیر مائیک والٹز کا کہنا ہے کہ امریکہ ایسے گروہ کے ساتھ اعتماد پر مبنی تعلقات قائم نہیں کر سکتا جو بے گناہ امریکیوں کو قید رکھے اور اپنے ہی عوام کے بنیادی حقوق کو نظر انداز کرے۔