رنویر سنگھ کے والد کا پونم ڈھلوں سے اظہارِ تشکر، فرحان اختر سے ناراضی کی تردید

ممبئی( شو بز ڈیسک)بالی ووڈ اداکار رنویر سنگھ پر عائد پابندی ختم ہونے کے بعد ان کے والد جگجیت سنگھ بھاونانی نے سنے اور ٹی وی آرٹسٹ ایسوسی ایشن آف انڈیا کی صدر پونم ڈھلوں کا شکریہ ادا کیا ہے۔پونم ڈھلوں کے مطابق رنویر سنگھ کے والد نے ان سے رابطہ کرکے حمایت پر اظہارِ تشکر کیا اور واضح کیا کہ ان کے یا رنویر سنگھ کے دل میں فلم ساز و اداکار فرحان اختر کے خلاف کوئی منفی جذبات موجود نہیں ہیں۔یہ پیش رفت اس وقت سامنے آئی جب فیڈریشن آف ویسٹرن انڈیا سائن ایمپلائز نے رنویر سنگھ کے خلاف جاری عدم تعاون کی ہدایت واپس لے لی۔ یہ تنازع فلم ’’ڈان 3‘‘ سے متعلق اختلافات کے بعد پیدا ہوا تھا۔پونم ڈھلوں نے ایک بھارتی میڈیا ادارے سے گفتگو میں کہا کہ رنویر سنگھ اور متعلقہ پروڈکشن ہاؤس کے درمیان ماضی سے خوشگوار تعلقات رہے ہیں۔ رنویر اس سے قبل ’’دل دھڑکنے دو‘‘ اور ’’گلی بوائے‘‘ جیسی فلموں میں ان کے ساتھ کام کر چکے ہیں۔انہوں نے کہا کہ ان کی حمایت صرف رنویر سنگھ تک محدود نہیں بلکہ فرحان اختر کے لیے بھی ہے، کیونکہ وہ بھی فنکار برادری کا اہم حصہ ہیں۔پونم ڈھلوں نے فیڈریشن کے معاملہ سنبھالنے کے انداز پر بھی تحفظات کا اظہار کرتے ہوئے کہا کہ اس تنازع کو بہتر طریقے سے حل کیا جا سکتا تھا۔یاد رہے کہ 2023 میں فرحان اختر نے اعلان کیا تھا کہ ’’ڈان 3‘‘ میں شاہ رخ خان کی جگہ رنویر سنگھ مرکزی کردار ادا کریں گے، تاہم بعد ازاں فلم سے متعلق مختلف افواہیں اور اختلافات خبروں کی زینت بنتے رہے۔تنازع اس وقت شدت اختیار کر گیا تھا جب فیڈریشن نے فلم سازوں کو رنویر سنگھ کے ساتھ کام نہ کرنے کی ہدایت جاری کی، تاہم بعد میں مخالفت اور قانونی اعتراضات سامنے آنے پر یہ فیصلہ واپس لے لیا گیا۔فیڈریشن کے صدر بی این تیواری کے مطابق رنویر سنگھ کی جانب سے قانونی نوٹس موصول ہونے سے قبل ہی عدم تعاون کی ہدایت ختم کرنے کا فیصلہ کیا جا چکا تھا۔