اسلام آباد( ہیلتھ ڈیسک)ماہرین کے مطابق صبح سویرے اٹھنے کے بعد ایک کپ کافی نہ صرف جسم کو توانائی فراہم کرتی ہے بلکہ اس کے متعدد دیگر صحت بخش فوائد بھی سامنے آئے ہیں۔ایک نئی تحقیق میں یہ بات سامنے آئی ہے کہ کیفین والی اور بغیر کیفین والی دونوں اقسام کی کافی آنتوں کے بیکٹیریا پر مثبت اثر ڈالتی ہیں، جس کے نتیجے میں مزاج بہتر ہوتا ہے اور ذہنی دباؤ میں کمی واقع ہوتی ہے۔یہ تحقیق یونیورسٹی کالج کارک آئرلینڈ کے اے پی سی مائیکرو بایوم کے محققین نے کی، جس میں آنت اور دماغ کے درمیان تعلق کو سمجھنے کی کوشش کی گئی۔اگرچہ پہلے سے یہ خیال موجود تھا کہ کافی ہاضمے کو بہتر بنانے اور ذہنی صحت کو فروغ دینے میں مددگار ہے، تاہم ان اثرات کے پیچھے حیاتیاتی عمل مکمل طور پر واضح نہیں تھا۔تحقیق کے دوران 62 افراد کا تفصیلی تجزیہ کیا گیا، جس میں نفسیاتی جائزے، غذائی عادات کی نگرانی اور فضلے و پیشاب کے نمونوں کا معائنہ شامل تھا۔ نتائج سے معلوم ہوا کہ کافی کا استعمال مجموعی طور پر آنتوں اور دماغی صحت دونوں پر مثبت اثرات مرتب کرتا ہے۔
