ممبئی( شو بز ڈیسک)بالی ووڈ کے لیجنڈری اداکار امیتابھ بچن کے گھر ’جلسہ‘ کے باہر ایک مداح شدید گرمی کے باعث بے ہوش ہو کر سڑک پر گر گیا۔بھارتی میڈیا رپورٹس کے مطابق واقعہ اتوار کے روز پیش آیا، جب سیکڑوں مداح اداکار کی ایک جھلک دیکھنے کے لیے ان کی رہائش گاہ کے باہر جمع تھے۔سوشل میڈیا پر وائرل ہونے والی ایک ویڈیو میں دیکھا جا سکتا ہے کہ ایک مداح اچانک سڑک پر گر پڑا، جس کے بعد وہاں موجود دیگر افراد نے فوری طور پر اسے سہارا دے کر محفوظ جگہ پر منتقل کیا۔امیتابھ بچن ہر اتوار اپنے مداحوں سے ملاقات کی روایت برقرار رکھتے ہیں اور اس حوالے سے تصاویر اور ویڈیوز بھی شیئر کرتے رہتے ہیں۔ حال ہی میں انہوں نے اپنے بلاگ میں لکھا کہ انہوں نے اپنی سیکیورٹی ٹیم کو ہدایت دی ہے کہ مداحوں کے ساتھ خوش اخلاقی اور احترام سے پیش آیا جائے۔اداکار نے اپنے پیغام میں کہا کہ مداحوں کی محبت اور دعائیں ان کے لیے باعثِ فخر ہیں۔ ان کے مطابق مداح ہی انہیں مزید محنت اور بہتر کام کرنے کا حوصلہ دیتے ہیں۔انہوں نے مزید لکھا کہ شدید دھوپ میں گھنٹوں انتظار کرنا آسان نہیں، اس لیے مداحوں کے ساتھ اچھا برتاؤ کرنا ضروری ہے۔
