لندن:عالمی شہرت یافتہ برطانوی گلوکارہ دعا لیپا اور معروف اداکار کالم ٹرنر نے اپنی محبت کو شادی کے بندھن میں پرو دیا۔ دونوں نے لندن میں ایک سادہ اور نجی تقریب کے دوران نکاح کر لیا، جس کی خبر سامنے آنے پر مداحوں میں خوشی کی لہر دوڑ گئی۔ذرائع کے مطابق شادی کی تقریب 31 مئی کو لندن کے ایک تاریخی شادی ہال میں منعقد ہوئی، جہاں صرف قریبی رشتہ داروں اور چند خاص دوستوں کو شرکت کی دعوت دی گئی تھی۔ تقریب کو نہایت سادگی کے ساتھ منعقد کیا گیا جبکہ بعد ازاں محدود مہمانوں کے اعزاز میں عشائیے کا بھی اہتمام کیا گیا۔شادی کے موقع پر دعا لیپا سفید عروسی لباس میں نہایت دلکش دکھائی دیں، جبکہ کالم ٹرنر نفیس نیلے لباس میں باوقار انداز کے ساتھ تقریب میں شریک ہوئے۔ شادی کے بعد دونوں کو خوشگوار موڈ میں ایک ساتھ دیکھا گیا۔قریبی ذرائع کا کہنا ہے کہ دلہن کو اپنی جانب آتے دیکھ کر کالم ٹرنر جذبات پر قابو نہ رکھ سکے اور ان کی آنکھیں نم ہو گئیں۔ اس یادگار منظر نے تقریب میں موجود اہل خانہ کو بھی متاثر کیا۔دعا لیپا اور کالم ٹرنر کے درمیان قربت کا آغاز 2024 کے اوائل میں ہوا تھا۔ بعد میں دونوں نے اپنے تعلق کا کھلے عام اعتراف کیا، جس کے بعد ان کے مداح مسلسل ان کی زندگی کے اہم مراحل پر نظر رکھے ہوئے تھے۔ گزشتہ برس منگنی کی اطلاعات سامنے آئیں اور اب شادی کی خبر نے مداحوں کی خوشی میں مزید اضافہ کر دیا ہے۔اطلاعات ہیں کہ یہ جوڑا اپنی شادی کی خوشیوں کا ایک اور بڑا جشن جلد بحیرۂ روم کے خوبصورت جزیرے سسلی میں منانے کا ارادہ رکھتا ہے۔قریبی عزیزوں اور دوستوں کی موجودگی میں منعقد ہونے والی یہ سادہ مگر پُراثر تقریب دونوں کی خواہش کے مطابق رہی، جبکہ دنیا بھر سے مداح نیک تمناؤں اور مبارک باد کے پیغامات بھیج رہے ہیں۔
