روسی وزیر داخلہ کی آرمی چیف سے ملاقات، سیکیورٹی تعاون پر تبادلہ خیال

**راولپنڈی (14 اکتوبر، 2026):** روسی فیڈریشن کے وزیر داخلہ ولادیمیر کولوکولٹسیف نے جنرل ہیڈکوارٹرز (جی ایچ کیو) راولپنڈی میں چیف آف آرمی اسٹاف و چیف آف ڈیفنس فورسز، فیلڈ مارشل سید عاصم منیر، نشانِ امتیاز (ملٹری)، ہلالِ جرات سے اہم ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات میں باہمی دلچسپی کے امور، خطے کی سیکیورٹی صورتحال اور بالخصوص دوطرفہ سیکیورٹی تعاون کے فروغ پر تفصیلی بات چیت ہوئی۔ دونوں رہنماؤں نے پاکستان اور روس کے سیکیورٹی اداروں کے مابین ادارہ جاتی روابط کو مزید قریب لانے اور باہمی رابطہ کاری کو مؤثر بنانے پر زور دیا۔

اس موقع پر آرمی چیف و چیف آف ڈیفنس فورسز نے روس کے ساتھ دیرینہ تعلقات کو مزید مستحکم کرنے کے عزم کا اعادہ کیا۔ انہوں نے باہمی دلچسپی کے شعبوں، خاص طور پر سیکیورٹی کے میدان میں ٹھوس اور عملی تعاون کو وسعت دینے کی ضرورت پر زور دیا۔

روسی وزیر داخلہ نے علاقائی امن و استحکام کے لیے پاکستان کی مسلسل کوششوں کو سراہا اور دہشت گردی کے خلاف جنگ میں پاک افواج کی پیشہ ورانہ صلاحیتوں اور عظیم قربانیوں کا اعتراف کیا۔