تربت: ایف سی بلوچستان (ساؤتھ) اور پارواز فاؤنڈیشن کے اشتراک سے تربت کے علاقے سمی میں واقع بچوں کے ایک طویل عرصے سے غیر فعال پارک کو مکمل طور پر بحال اور ازسرِ نو فعال کر دیا گیا ہے۔
یہ منصوبہ علاقے کے بچوں کو ایک محفوظ، جدید اور صحت مند تفریحی ماحول فراہم کرنے کے لیے شروع کیا گیا، جسے مقامی سطح پر مثبت پیش رفت قرار دیا جا رہا ہے۔
پارک میں طویل عرصے سے عدم توجہی اور خستہ حالی کے باعث خراب ہونے والے بنیادی ڈھانچے کی مکمل مرمت کی گئی اور اسے جدید سہولیات سے آراستہ کیا گیا۔
بحالی کے دوران بچوں کے لیے نئے اور محفوظ جھولے، سلائیڈز اور دیگر جدید کھیلوں کا سامان نصب کیا گیا، جبکہ ایک صاف ستھرا اور محفوظ گرین ایریا بھی تیار کیا گیا تاکہ خاندانوں کو تفریح کے لیے بہتر ماحول میسر آ سکے۔
پارک کی باقاعدہ افتتاحی تقریب منعقد کی گئی، جس کا افتتاح مکران سکاوٹس کے ونگ کمانڈر نے بطور مہمانِ خصوصی کیا۔ تقریب میں مقامی قبائلی عمائدین، سول سوسائٹی کے نمائندگان اور بڑی تعداد میں بچوں نے شرکت کی۔
اس موقع پر حکام نے کہا کہ سیکیورٹی فورسز اور انتظامی ادارے بلوچستان میں پائیدار امن، ترقیاتی منصوبوں اور عوامی فلاح و بہبود کے لیے اپنے اقدامات جاری رکھیں گے۔