ٹی ڈی اے پی اور پی ایچ ڈی ای سی کا لسبیلہ چیمبر میں ہیلپ ڈیسک قائم کرنے کا فیصلہ
لسبیلہ: جنوبی بلوچستان میں تجارت اور برآمدات کو مضبوط بنانے کے لیے ٹریڈ ڈویلپمنٹ اتھارٹی آف پاکستان (TDAP) اور پاکستان ہارٹی کلچر ڈویلپمنٹ اینڈ ایکسپورٹ کمپنی (PHDEC) کے اعلیٰ حکام نے لسبیلہ چیمبر آف کامرس اینڈ انڈسٹری (LCCI) کا دورہ کیا، جہاں ایک مشترکہ ہیلپ ڈیسک قائم کرنے کا فیصلہ کیا گیا۔
وفد کا استقبال لسبیلہ چیمبر کے صدر اور حب سالٹ کے سی ای او اسماعیل ستار نے کیا، جبکہ ڈپٹی کمشنر حب جمعداد بھی اجلاس میں شریک ہوئے۔
اجلاس میں جنوبی بلوچستان کے صنعتی زون لسبیلہ اور ماربل سٹی میں کام کرنے والی تقریباً 300 مقامی کمپنیوں اور زراعت و ہارٹی کلچر سے وابستہ برآمد کنندگان کو درپیش مسائل اور انہیں حکومتی سطح پر معاونت فراہم کرنے پر تفصیلی غور کیا گیا۔
اجلاس سے قبل ٹی ڈی اے پی کے حکام نے حب سالٹ انڈسٹری کا دورہ بھی کیا، جہاں اسماعیل ستار نے بلوچستان خصوصاً معدنیات کے شعبے میں موجود تجارتی و معاشی مواقع پر روشنی ڈالی۔
انہوں نے بتایا کہ صرف حب شہر ملک کی مجموعی ٹیکس وصولی میں تقریباً 480 ارب روپے کا حصہ ڈالتا ہے۔
ٹی ڈی اے پی، پی ایچ ڈی ای سی اور لسبیلہ چیمبر کے حکام نے باہمی تعاون کے ذریعے برآمدات کے فروغ اور معاشی ترقی کے لیے مشترکہ لائحہ عمل بنانے پر اتفاق کیا۔
یہ اقدام بلوچستان کے صنعتی، زرعی اور برآمدی امکانات کو بروئے کار لانے کی جانب ایک اہم پیش رفت قرار دیا جا رہا ہے۔