ایک سال بعد تاپسی پنو کی سوشل میڈیا پر واپسی، دوری کی وجہ بھی بتا دی

ممبئی( شو بز ڈیسک)بالی ووڈ اداکارہ تاپسی پنو نے تقریباً ایک سال کے وقفے کے بعد سوشل میڈیا پر واپسی کرتے ہوئے اپنی غیر موجودگی کی وجہ بھی بیان کر دی۔38 سالہ اداکارہ کا کہنا ہے کہ سوشل میڈیا سے دور رہنے کا فیصلہ کسی تشہیری مہم یا حکمت عملی کا حصہ نہیں تھا بلکہ انہوں نے ذہنی سکون، ذاتی زندگی اور وقت کے بہتر استعمال کے لیے یہ قدم اٹھایا تھا۔تاپسی پنو نے کہا کہ سوشل میڈیا پر مسلسل متحرک رہنے، توجہ کا مرکز بنے رہنے اور ہر وقت خود کو نمایاں دکھانے کی دوڑ ذہنی طور پر تھکا دینے والی ہوتی ہے۔انہوں نے بتایا کہ اسی وجہ سے انہوں نے اپنے فون سے سوشل میڈیا کی تمام ایپس حذف کر دی تھیں اور اپنی توجہ حقیقی زندگی کی سرگرمیوں پر مرکوز کر لی تھی۔ اس دوران انہیں احساس ہوا کہ سوشل میڈیا ان کے وقت کا ایک بڑا حصہ ضائع کر رہا تھا۔اداکارہ نے کہا کہ انہیں معلوم تھا کہ سوشل میڈیا سے دوری کی وجہ سے پیشہ ورانہ سطح پر کچھ مشکلات کا سامنا کرنا پڑ سکتا ہے، کیونکہ کئی تجارتی ادارے ایسے فنکاروں کو ترجیح دیتے ہیں جن کی آن لائن موجودگی زیادہ ہو۔تاپسی کا کہنا تھا کہ اگر کوئی ادارہ کسی شخصیت کے ساتھ کام کرنا چاہتا ہے تو اسے اس کی اصل شناخت اور صلاحیتوں کی بنیاد پر انتخاب کرنا چاہیے، نہ کہ اسے کسی مقبول سوشل میڈیا شخصیت جیسا بننے پر مجبور کرنا چاہیے۔انہوں نے مزید بتایا کہ وہ ان دنوں اپنے شوہر اور اہلِ خانہ کے ساتھ ڈنمارک میں وقت گزار رہی ہیں، جہاں ان کی روزمرہ زندگی میں گھریلو مصروفیات، باغبانی، سائیکلنگ اور جسمانی فٹنس کی سرگرمیاں شامل ہیں۔