وزیراعظم کا ’’اپنا گھر اسکیم‘‘ کا اجرا، آئندہ بجٹ میں عوام کے لیے مزید سہولتوں کا اعلان

اسلام آباد( بلو چستان خبر) وزیراعظم شہباز شریف نے ’’اپنا گھر اسکیم‘‘ کا باضابطہ اجرا کرتے ہوئے اعلان کیا ہے کہ آئندہ وفاقی بجٹ میں عوام کے لیے مزید بڑی سہولتیں دی جائیں گی۔وفاقی دارالحکومت میں تقریب سے خطاب کرتے ہوئے وزیراعظم نے کہا کہ حکومت عوامی فلاح کے لیے اہم اور نمایاں اقدامات متعارف کرانے کی تیاری کر رہی ہے، جن کا اعلان آئندہ بجٹ میں کیا جائے گا۔انہوں نے بتایا کہ ’’اپنا گھر اسکیم‘‘ کے تحت شہریوں کو ایک کروڑ روپے تک قرض آسان شرائط پر فراہم کیا جائے گا تاکہ وہ اپنا ذاتی گھر تعمیر کر سکیں۔ یہ اسکیم ملک کے تمام صوبوں سمیت گلگت بلتستان اور آزاد کشمیر تک نافذ ہوگی۔وزیراعظم کے مطابق اس منصوبے کے پہلے مرحلے میں 50 ہزار گھروں کے لیے فنانسنگ فراہم کی جائے گی، جس کے لیے 321 ارب روپے مختص کیے گئے ہیں۔ مجموعی طور پر آئندہ چار برسوں میں 5 لاکھ گھروں کی تعمیر کا ہدف مقرر کیا گیا ہے۔انہوں نے کہا کہ حکومت کی کوشش ہے کہ ہر شہری کو باعزت رہائش میسر آئے، کیونکہ اپنا گھر ہونا ایک بنیادی ضرورت اور ریاستی ذمہ داری ہے۔وزیراعظم نے بتایا کہ اس اسکیم کا مجموعی حجم 3.2 کھرب روپے تک پہنچے گا، جبکہ 10 مرلے تک کے پلاٹس پر گھر بنانے کی سہولت فراہم کی جائے گی۔ انہوں نے یقین دہانی کرائی کہ وہ خود اس منصوبے کی پیش رفت کا ماہانہ بنیادوں پر جائزہ لیں گے۔انہوں نے مزید کہا کہ اسکیم میں شریک بینکوں کی کارکردگی کو سراہا جائے گا اور 14 اگست کو نمایاں کارکردگی دکھانے والے اداروں کو اعزازات دیے جائیں گے۔وزیراعظم کا کہنا تھا کہ اس منصوبے سے تعمیراتی شعبے کے ساتھ ساتھ صنعت و معیشت کو بھی فروغ ملے گا۔