اسلام آباد: وزیراعلیٰ بلوچستان میر سرفراز بگٹی نے جمعرات کو اسپیکر قومی اسمبلی سردار ایاز صادق سے ملاقات کی، جس میں باہمی دلچسپی کے امور، ملک کی سیاسی صورتحال، وفاق اور صوبوں کے درمیان تعاون، اور بلوچستان کی مجموعی ترقی پر تفصیلی تبادلہ خیال کیا گیا۔
ملاقات کے دوران وزیراعلیٰ بلوچستان نے اسپیکر قومی اسمبلی کو صوبے میں جاری ترقیاتی منصوبوں، امن و امان کی صورتحال اور عوامی فلاح و بہبود کے اقدامات پر بریفنگ دی۔
میر سرفراز بگٹی نے کہا کہ بلوچستان کی پائیدار ترقی اور قومی دھارے میں مؤثر شمولیت کے لیے وفاقی تعاون اور مضبوط ہم آہنگی ناگزیر ہے۔
اسپیکر قومی اسمبلی سردار ایاز صادق نے بلوچستان کی ترقی اور استحکام کے لیے وفاقی سطح پر مکمل تعاون کی یقین دہانی کرائی۔ انہوں نے کہا کہ بلوچستان پاکستان کی ترقی اور خوشحالی میں کلیدی اہمیت رکھتا ہے اور صوبے کے عوام کو درپیش مسائل کے حل کے لیے مشترکہ کوششیں جاری رکھی جائیں گی۔
ملاقات میں پارلیمانی امور، بین الصوبائی ہم آہنگی اور ملک کی مجموعی سیاسی صورتحال پر بھی گفتگو کی گئی۔