جنوبی وزیرستان میں افغان اشتعال انگیزی، پاک فوج کی جوابی کارروائی میں متعدد پوسٹس تباہ

جنوبی وزیرستان( بلو چستان خبر) انگور اڈہ کے علاقے زلول خیل میں افغان اشتعال انگیزی کے بعد پاک فوج نے بھرپور اور مؤثر جوابی کارروائی کرتے ہوئے متعدد دشمن پوسٹس کو نشانہ بنایا۔سیکیورٹی ذرائع کے مطابق پاک فوج کی بروقت کارروائی کے نتیجے میں فتنہ الخوارج کی دراندازی کی کوششیں ناکام بنا دی گئیں اور علاقے میں سیکیورٹی صورتحال کو کنٹرول میں لے لیا گیا۔ذرائع کا کہنا ہے کہ دراندازی میں ناکامی کے بعد افغان طالبان کی جانب سے سول آبادی کو نشانہ بنایا گیا، جس کے نتیجے میں فائرنگ سے دو خواتین سمیت تین شہری زخمی ہو گئے جنہیں فوری طور پر وانا اسپتال منتقل کیا گیا۔سیکیورٹی حکام کے مطابق افغان طالبان کی جانب سے زلول خیل اور انگور اڈہ کے علاقے میں بلااشتعال فائرنگ کی گئی، جس کے جواب میں پاک فوج نے مؤثر کارروائی کرتے ہوئے متعدد افغان چوکیوں کو تباہ کر دیا۔علاقے میں صورتحال پر نظر رکھی جا رہی ہے جبکہ سیکیورٹی فورسز نے کسی بھی ممکنہ دراندازی کو ناکام بنانے کے لیے گشت مزید سخت کر دیا ہے۔