وزیر تعلیم بلوچستان کا طلبہ کو یکساں تعلیمی مواقع فراہم کرنے کے عزم کا اظہار
کوئٹہ: وزیر تعلیم بلوچستان راحیلہ حمید خان درانی نے کہا ہے کہ صوبائی حکومت بلوچستان بھر کے طلبہ کو یکساں تعلیمی مواقع فراہم کرنے اور تعلیم کے مجموعی معیار کو بہتر بنانے کے لیے پُرعزم ہے۔
انہوں نے یہ بات جماعت الصالحین پاکستان کے مرکزی ناظمِ اعلیٰ صاحبزادہ پیر سکندر سلطان سے اپنے دفتر میں ملاقات کے دوران کہی۔
ملاقات میں بلوچستان کے تعلیمی نظام سے متعلق مختلف امور پر تبادلہ خیال کیا گیا، جن میں سرکاری اسکولوں میں طلبہ کو درپیش مسائل، تعلیمی سہولیات کی بہتری اور معیارِ تعلیم کو بلند کرنے کے اقدامات شامل تھے۔
شرکاء نے اس بات پر زور دیا کہ صوبے کے دور دراز علاقوں میں بھی تعلیمی سہولیات کی فراہمی یقینی بنائی جائے تاکہ ہر بچے کو معیاری تعلیم تک رسائی حاصل ہو سکے۔
اجلاس میں اساتذہ کی کمی، اسکولوں میں بنیادی سہولیات کے فقدان، صاف پانی، فرنیچر، بجلی اور طلبہ کے لیے بہتر تعلیمی ماحول کی فراہمی جیسے مسائل پر بھی تفصیلی گفتگو کی گئی۔
اس موقع پر وزیر تعلیم راحیلہ حمید درانی نے کہا کہ بلوچستان حکومت تعلیمی شعبے کی بہتری کے لیے عملی اقدامات کر رہی ہے۔
انہوں نے کہا کہ سرکاری اسکولوں میں سہولیات کی بہتری، اساتذہ کی حاضری یقینی بنانے اور تعلیمی معیار بلند کرنے کے لیے مختلف منصوبوں پر کام جاری ہے۔
صاحبزادہ پیر سکندر سلطان نے کہا کہ تعلیم قومی ترقی کی بنیاد ہے اور بلوچستان کے بچوں کو جدید اور معیاری تعلیم فراہم کرنا وقت کی اہم ضرورت ہے۔
انہوں نے کہا کہ معاشرے کے تمام طبقات کو تعلیم کے فروغ اور نئی نسل کے روشن مستقبل کے لیے مشترکہ کردار ادا کرنا چاہیے۔
انہوں نے صحت اور تعلیم سمیت مختلف شعبوں میں بہتری کے لیے صوبائی حکومت اور وزیر تعلیم کے اقدامات کو بھی سراہا۔
ملاقات کے اختتام پر دونوں جانب سے صوبے میں تعلیمی ترقی اور باہمی تعاون جاری رکھنے پر اتفاق کیا گیا۔