لاہور (سپورٹس ڈیسک) عالمی انسداد ڈوپنگ ادارے نے ماسکو لیبارٹری کے ڈیٹا کی بنیاد پر ہونے والی تحقیقات کامیابی سے مکمل کرنے کا اعلان کر دیا ہے۔ادارے کے مطابق آپریشن لِمز کے تحت کی گئی تحقیقات کے نتیجے میں 291 روسی کھلاڑیوں کو سزائیں دی گئیں جبکہ مجموعی طور پر 302 پابندیاں عائد کی گئیں۔رپورٹ میں بتایا گیا ہے کہ 22 مختلف کھیلوں سے تعلق رکھنے والے کھلاڑیوں کو 23 انسداد ڈوپنگ تنظیموں کی جانب سے سزائیں سنائی گئیں، جن میں ویٹ لفٹنگ اور ایتھلیٹکس کے کھلاڑی سب سے زیادہ متاثر ہوئے۔مزید برآں 11 کھلاڑیوں کو ایک سے زائد خلاف ورزیوں پر سزا دی گئی جبکہ چار کیسز تاحال زیر سماعت ہیں۔ادارے کے صدر وٹولڈ بانکا نے اس تحقیقات کو تاریخ کی کامیاب ترین کارروائی قرار دیا ہے۔یاد رہے کہ 2015 میں روس میں ریاستی سرپرستی میں ڈوپنگ پروگرام کا انکشاف ہوا تھا جس کے بعد روسی انسداد ڈوپنگ ادارے کو معطل کر دیا گیا تھا، تاہم 2018 میں سخت شرائط کے ساتھ بحال کیا گیا اور 2019 میں ماسکو لیبارٹری سے حاصل ہونے والے ڈیٹا نے مزید کارروائی کی بنیاد فراہم کی۔
