چلاس میں پیٹ کے کیڑوں کی دوا کے بعد بچوں کی حالت خراب، اسپتال منتقل

اسلام آباد( ہیلتھ ڈیسک)چلاس کے تعلیمی اداروں میں پیٹ کے کیڑوں سے بچاؤ کے لیے دی جانے والی دوا پینے کے بعد بیس سے زائد بچوں کی حالت اچانک خراب ہو گئی، جس پر انہیں فوری طور پر اسپتال منتقل کر دیا گیا۔ریجنل اسپتال کے میڈیکل سپرنٹنڈنٹ ڈاکٹر نواب خان کے مطابق بچوں میں دوا کے استعمال کے بعد خوف اور ذہنی دباؤ پیدا ہوا، جس کے باعث ان کی طبیعت متاثر ہوئی۔انہوں نے بتایا کہ بروقت طبی امداد کے بعد بیشتر بچوں کی حالت بہتر ہو گئی ہے اور انہیں گھروں کو روانہ کر دیا گیا ہے، جبکہ باقی بچوں کی حالت بھی اب خطرے سے باہر ہے۔ڈاکٹر نواب خان نے والدین سے اپیل کی ہے کہ وہ بچوں کو ایسی ادویات کے بارے میں آگاہی دیں تاکہ خوف اور غلط فہمی سے بچا جا سکے۔ضلعی انتظامیہ کے مطابق سیٹلائٹ ٹاؤن کے مختلف سرکاری اسکولوں میں بچوں کو یہ دوا دی گئی تھی، جس کے بعد یہ واقعہ پیش آیا۔