امتحانی پرچوں کے آؤٹ ہونے پر مرکزی وزیر تعلیم سے استعفے کا مطالبہ؛ مودی کی انتہا پسند پالیسیوں سے مایوس کروڑوں بیروزگار نوجوان ایک پلیٹ فارم پر منظم
نئی دہلی — بھارت میں انتہا پسند بی جے پی اور مودی حکومت کی ناقص معاشی پالیسیوں کے خلاف ملک کے اعلیٰ تعلیم یافتہ مگر بیروزگار نوجوانوں نے ایک انوکھا اور انتہائی مؤثر طریقۂ احتجاج اختیار کر لیا ہے۔ مودی حکومت کی کارکردگی سے شدید مایوس بھارتی نوجوانوں کی شروع کردہ طنزیہ تحریک ’کاکروچ جنتا پارٹی‘ (CJP) اب ایک بڑی علامتی اور سیاسی جماعت کی شکل اختیار کرتی جا رہی ہے، جس نے نئی دہلی کے ایوانوں میں ہلچل مچا دی ہے۔
عالمی جریدے ساؤتھ چائنا مارننگ پوسٹ اور بین الاقوامی میڈیا رپورٹس کے مطابق، مودی حکومت کے خلاف کاکروچ جنتا پارٹی کی یہ تحریک اب سری لنکا اور بنگلہ دیش جیسے بڑے عوامی انقلابات کی شکل اختیار کرتی جا رہی ہے، جہاں نوجوان سڑکوں پر نکل کر نظام کو چیلنج کر رہے ہیں۔
تحریک کا پس منظر: عدالتی توہین کو احتجاج کا ہتھیار بنا لیا
اس انوکھی تحریک کا آغاز مئی 2026 میں اس وقت ہوا جب ایک عدالتی سماعت کے دوران جج کی جانب سے احتجاج کرنے والے بیروزگار نوجوانوں کو مبینہ طور پر سماج کے لیے "کاکروچ" اور "پراسائٹس" (طفیلئے) قرار دیا گیا۔
مودی سرکار سے نالاں 30 سالہ نوجوان پبلک ریلیشنز اسٹریٹجسٹ ابھیجیت دیپکے نے اس توہین آمیز لفظ کو مودی کی ’بھارتیہ جنتا پارٹی‘ کے متبادل کے طور پر ’کاکروچ جنتا پارٹی‘ میں بدل دیا اور ایک ایسی ویب سائٹ بنائی جو دیکھتے ہی دیکھتے کروڑوں نوجوانوں کی آواز بن گئی۔
انسٹاگرام اور دیگر سوشل میڈیا پلیٹ فارمز پر اس تحریک کے فالوورز کی تعداد 2 کروڑ سے تجاوز کر چکی ہے اور لاکھوں طلبہ نے اس کے باقاعدہ شناختی کارڈز حاصل کر لیے ہیں۔
کاکروچ جنتا پارٹی کے بنیادی مطالبات اور مودی سرکار پر دباؤ
کاکروچ جنتا پارٹی صرف انٹرنیٹ تک محدود نہیں رہی بلکہ اب نئی دہلی میں پارلیمنٹ ہاؤس کے قریب، بنگلور کے فریڈم پارک اور حیدرآباد سمیت کئی بڑے شہروں میں اس کے بڑے بڑے جسمانی مظاہرے ہو رہے ہیں۔ تحریک کے بڑے مطالبات درج ذیل ہیں:
وزیر تعلیم کا استعفیٰ: بھارت میں حالیہ میڈیکل (NEET) اور دیگر بڑے قومی امتحانات کے پرچے مسلسل لیک (آؤٹ) ہونے پر کاکروچ جنتا پارٹی نے مودی کے مرکزی وزیر تعلیم دھرمیندر پردھان سے فوری استعفے کا مطالبہ کیا ہے۔
روزگار کی فراہمی: احتجاجی نوجوان ہاتھوں میں ترنگا جھنڈا اور کتابیں لے کر سڑکوں پر نکل رہے ہیں اور نعرے لگا رہے ہیں کہ "روزگار کہاں ہے؟"
مودی کے اقتدار کی بنیادیں ہلنے کا خدشہ
عالمی معاشی اور سیاسی ماہرین کے مطابق، ہندوتوا کی انتہا پسندانہ سیاست میں الجھی مودی سرکار اس وقت صرف اپنا اقتدار بچانے کی جوڑ توڑ میں مصروف دکھائی دیتی ہے، جبکہ بیروزگاری، مہنگائی اور تعلیمی نظام کی تباہی جیسے حقیقی عوامی مسائل کو پسِ پشت ڈال دیا گیا ہے۔
سیاسی تجزیہ کاروں کا کہنا ہے کہ ’کاکروچ جنتا پارٹی‘ کی بھارتی نوجوانوں میں روز بروز بڑھتی ہوئی یہ مقبولیت اور غصہ مستقبل قریب میں نااہل مودی سرکار کے اقتدار کی بنیادیں ہلانے کی بھرپور صلاحیت رکھتا ہے۔