غزہ( مانیٹرنگ ڈیسک) غزہ کی پٹی میں اسرائیلی فضائی حملوں کے نتیجے میں 9 سالہ بچے سمیت 5 فلسطینی شہید ہو گئے، جبکہ متعدد افراد زخمی بھی ہوئے ہیں۔حکام کے مطابق غزہ شہر کے علاقے رمال میں ایک ڈرون نے گاڑی کو نشانہ بناتے ہوئے دو میزائل فائر کیے، جس کے نتیجے میں 4 افراد شہید اور 6 زخمی ہو گئے۔اسی طرح جنوبی غزہ کے علاقے خان یونس کے مشرق میں ایک علیحدہ واقعے میں 9 سالہ عدیل اس وقت شہید ہو گیا جب ڈرون حملے اور توپ خانے کی گولہ باری ساتھ ساتھ جاری تھی۔اسرائیلی فوج نے دعویٰ کیا ہے کہ علاقے میں ایک مشتبہ شخص فوجی دستوں کی جانب بڑھا اور فوری خطرہ پیدا ہوا، تاہم اس دعوے کے حق میں کوئی ثبوت پیش نہیں کیا گیا۔ناصر ہسپتال کے باہر موجود اہل خانہ کا کہنا تھا کہ بچہ کھانا پکانے کے لیے آگ جلانے کی غرض سے گتے کے ٹکڑے اکٹھے کر رہا تھا۔رپورٹ کے مطابق اکتوبر 2025 میں جنگ بندی کے باوجود غزہ پر حملوں کا سلسلہ جاری ہے۔ سات اکتوبر 2023 سے شروع ہونے والی جنگ میں اب تک 72 ہزار 594 افراد شہید اور ایک لاکھ 72 ہزار 404 افراد زخمی ہو چکے ہیں۔
