اسلام آباد (ویب ڈیسک): خصوصی سرمایہ کاری سہولت کونسل نے گزشتہ تین سالوں کے دوران ملکی معیشت کو خود انحصاری کی راہ پر گامزن کرنے کے لیے مقامی وسائل اور پیداوار میں 'ویلیو ایڈیشن' کو فروغ دے کر برآمدات میں اضافے کے لیے کلیدی کردار ادا کیا ہے۔

معدنی شعبہ: پنک سالٹ کے لیے 200 ملین ڈالر کا تاریخی معاہدہ

خود انحصاری کے قومی وژن کے تحت بین الاقوامی معیار کو مدنظر رکھتے ہوئے معدنی شعبے میں خام مال کی مقامی سطح پر پروسیسنگ اور ویلیو ایڈیشن میں خاطر خواہ بہتری آئی ہے۔ اسی سلسلے میں پاکستان منرل ڈیولپمنٹ کارپوریشن نے پِنک سالٹ کی ویلیو ایڈیشن اور عالمی منڈیوں تک رسائی بڑھانے کے لیے امریکی کمپنی 'ایم ایس سی آئی' کے ساتھ 200 ملین ڈالر کا ایک بڑا معاہدہ کیا ہے، جس سے نمک کی خام برآمد کے بجائے تیار شدہ مصنوعات باہر بھیجی جائیں گی۔

حلال گوشت اور خشک میوہ جات کی برآمدات کے نئے اہداف

خام مال کو قیمتی مصنوعات میں تبدیل کرنے کی حکمت عملی کے تحت دیگر شعبوں میں بھی اہم پیشرفت دیکھنے میں آئی ہے:

حلال گوشت: ملائیشیا سمیت دیگر خلیجی و ایشیائی ممالک میں حلال گوشت کی برآمدات کو بین الاقوامی معیار کے مطابق بڑھانے کے لیے ملک میں جدید ترین سلاٹر ہاؤسز (Slaughterhouses) قائم کیے گئے ہیں۔

خشک میوہ جات: چین کی معروف کمپنی کے تعاون سے مقامی چلغوزے اور دیگر ڈرائی فروٹس کی ویلیو ایڈیشن کر کے سالانہ 500 ملین ڈالر کی برآمدات کا ہدف مقرر کیا گیا ہے۔

زراعت، میڈیکل اور ٹیکنالوجی انڈسٹری میں خود انحصاری

ایس آئی ایف سی کی جامع پالیسیوں کے باعث زرعی شعبے کی مجموعی پیداوار میں نہ صرف بہتری آئی ہے بلکہ ویلیو ایڈڈ زرعی مصنوعات کی برآمدات میں بھی نمایاں اضافہ ریکارڈ کیا گیا ہے۔

علاوہ ازیں، صنعتی و تکنیکی شعبے میں پہلی بار مقامی سطح پر تیار کردہ طبی وینٹی لیٹرز اور سیمی کنڈکٹرز انڈسٹری کا قیام عمل میں لایا گیا ہے، جو ملک کو تکنیکی خود انحصاری کی طرف لے جانے اور ہائی ٹیک برآمدات بڑھانے کی جانب ایک انقلابی قدم ہے۔ معاشی ماہرین کے مطابق، ایس آئی ایف سی کے یہ مسلسل اقدامات ملک میں پائیدار سرمایہ کاری اور برآمدات کے لیے ایک طویل المیعاد سازگار ماحول فراہم کر رہے ہیں