ممبئی( شو بز ڈیسک) بھارتی سپر اسٹار یش کی آنے والی فلم ’ٹاکسک‘ کی ریلیز ایک بار پھر مؤخر کر دی گئی ہے، جس کے بعد مداحوں میں شدید مایوسی اور غصے کی لہر دیکھی جا رہی ہے۔فلم سازوں کی جانب سے سوشل میڈیا پر جاری بیان میں کہا گیا ہے کہ فلم کو عالمی سطح پر زیادہ بڑے ناظرین تک پہنچانے اور بہتر ریلیز حکمتِ عملی کے تحت ملتوی کیا گیا ہے۔ابتدائی طور پر یہ فلم 19 مارچ کو ریلیز ہونا تھی، تاہم بعد ازاں امریکا اور ایران کے درمیان کشیدگی کے باعث اسے 4 جون 2026 تک مؤخر کیا گیا تھا۔ اب ایک بار پھر نئی تاریخ کا اعلان نہیں کیا گیا، جس سے غیر یقینی صورتحال برقرار ہے۔یہ فیصلہ ’سینماکون‘ میں فلم کی پریزنٹیشن کے بعد سامنے آیا، جہاں بین الاقوامی ڈسٹری بیوٹرز اور انڈسٹری سے مثبت ردعمل ملا تھا، تاہم مسلسل تاخیر نے مداحوں کی توقعات کو متاثر کیا ہے۔سوشل میڈیا پر صارفین نے اس تاخیر پر مایوسی کا اظہار کرتے ہوئے کہا کہ بار بار مؤخر ہونے سے فلم کی ہائپ کمزور ہو رہی ہے، جبکہ کچھ مداحوں نے اسے سینما کے بجائے او ٹی ٹی پلیٹ فارم پر ریلیز کرنے کا مطالبہ بھی کیا ہے۔
