لاس اینجلس( شوبز ڈیسک)امریکی فلم اور ٹی وی اداکار جیمز ہینڈی کو لاس اینجلس میں ان کی رہائش گاہ پر چاقو کے وار کرکے قتل کر دیا گیا۔ پولیس نے واقعے کے فوری بعد ایک مشتبہ شخص کو حراست میں لے لیا ہے۔غیر ملکی ذرائع ابلاغ کے مطابق 81 سالہ اداکار پر حملہ 3 جون کو ان کے گھر میں کیا گیا۔ پولیس کو صبح کے وقت واقعے کی اطلاع موصول ہوئی، جس کے بعد اہلکار فوری طور پر جائے وقوع پر پہنچ گئے۔پولیس حکام کے مطابق جیمز ہینڈی کو شدید زخمی اور بے ہوش حالت میں پایا گیا۔ ان کے سینے پر چاقو کے وار کے نشانات موجود تھے۔ انہیں فوری طور پر اسپتال منتقل کیا گیا، تاہم وہ جانبر نہ ہو سکے اور ڈاکٹروں نے ان کی موت کی تصدیق کر دی۔رپورٹس کے مطابق 44 سالہ مائیکل گلیڈل نامی شخص کو موقع سے گرفتار کیا گیا۔ بتایا جاتا ہے کہ مشتبہ ملزم نے خود پولیس کو اطلاع دیتے ہوئے اعتراف کیا کہ جیمز ہینڈی پر حملہ اسی نے کیا تھا۔ذرائع کے مطابق مائیکل گلیڈل اپنی والدہ کے ساتھ رہتا تھا، جن کے بارے میں کہا جا رہا ہے کہ ان کا جیمز ہینڈی کے ساتھ قریبی تعلق تھا۔جیمز ہینڈی نے 1977 میں اپنے فنی سفر کا آغاز کیا تھا اور کئی معروف فلموں اور ٹی وی پروگراموں میں اپنی اداکاری کے جوہر دکھائے۔ ان کے نمایاں کاموں میں ’’ٹاپ گن: میورک‘‘ اور ’’جمانجی‘‘ سمیت متعدد کامیاب فلمیں شامل ہیں۔پولیس نے واقعے کی مزید تحقیقات شروع کر دی ہیں جبکہ قتل کے محرکات جاننے کے لیے مختلف پہلوؤں کا جائزہ لیا جا رہا ہے۔
