ممبئی:بالی ووڈ کے معروف اداکار منوج باجپائی نے انکشاف کیا ہے کہ وہ متعدد مواقع پر اداکاری کو خیرباد کہنے کے بارے میں سنجیدگی سے غور کر چکے ہیں، تاہم منفرد اور دلچسپ کردار انہیں دوبارہ فن کی جانب لے آتے ہیں۔57 سالہ اداکار، جو گزشتہ تین دہائیوں سے بھارتی فلمی صنعت کا حصہ ہیں، نے ایک حالیہ گفتگو میں کہا کہ اب وہ اپنے فنی سفر میں کچھ مختلف تجربات کرنا چاہتے ہیں۔ ان کے مطابق وہ کمرشل اور مزاحیہ نوعیت کی فلموں میں کام کرنے کے خواہش مند ہیں تاکہ سنجیدہ اور جذباتی کرداروں سے ہٹ کر ناظرین کو اپنا ایک نیا انداز دکھا سکیں۔منوج باجپائی نے کہا کہ گزشتہ تقریباً دس برسوں کے دوران کئی بار ان کے ذہن میں اداکاری چھوڑنے کا خیال آیا، لیکن ہر بار کوئی ایسا کردار سامنے آ گیا جس نے انہیں دوبارہ کام جاری رکھنے پر آمادہ کر دیا۔انہوں نے واضح کیا کہ وہ صرف معاشی ضرورت کے تحت اداکاری نہیں کرنا چاہتے بلکہ ان کی خواہش ہے کہ وہ صرف ایسے کردار قبول کریں جو انہیں تخلیقی اطمینان اور خوشی فراہم کریں۔فلم Satya سے غیر معمولی شہرت حاصل کرنے والے اداکار کا کہنا تھا کہ آج کل ان کا دل ایک مکمل تفریحی اور مزاحیہ فلم میں کام کرنے کو چاہتا ہے۔ ان کے بقول وہ ایسی فلم کا حصہ بننا چاہتے ہیں جس میں سنجیدگی کے بجائے ہلکا پھلکا مزاح اور بھرپور تفریح ہو۔
