بلوچستان بھر میں دفعہ 144 نافذ، موٹر سائیکل کی ڈبل سواری اور اجتماعات پر پابندی
کوئٹہ: بلوچستان حکومت نے ممکنہ دہشت گردی کے خطرات کے پیش نظر سیکیورٹی اقدامات سخت کرتے ہوئے صوبے بھر میں 30 روز کے لیے دفعہ 144 نافذ کر دی ہے۔
محکمہ داخلہ کی جانب سے جاری نوٹیفکیشن کے مطابق پابندیوں کا اطلاق فوری طور پر کر دیا گیا ہے، جس کے تحت اسلحے کی نمائش، موٹر سائیکل کی ڈبل سواری، اور پانچ یا اس سے زائد افراد کے اجتماعات پر پابندی عائد کر دی گئی ہے۔
نوٹیفکیشن میں عوامی مقامات پر ماسک، مفلر یا کسی بھی چیز سے چہرہ ڈھانپنے پر بھی پابندی عائد کی گئی ہے تاکہ افراد کی واضح شناخت ممکن بنائی جا سکے۔
حکام کے مطابق تمام ڈویژنل کمشنرز، ڈپٹی کمشنرز، پولیس حکام اور متعلقہ اداروں کو ہدایات جاری کر دی گئی ہیں کہ وہ ان پابندیوں پر سختی سے عملدرآمد یقینی بنائیں۔ خلاف ورزی کرنے والوں کے خلاف قانونی کارروائی کی جائے گی۔
محکمہ داخلہ کے میڈیا اسسٹنٹ بابر یوسفزئی نے کہا کہ دفعہ 144 کے نفاذ کے بعد صوبے بھر میں موٹر سائیکل کی ڈبل سواری اور چار سے زائد افراد کے اجتماعات پر پابندی نافذ ہو چکی ہے۔
انہوں نے کہا کہ کالعدم تنظیموں، جنہیں ریاست کی جانب سے “فتنہ الخوارج” اور “فتنہ الہندوستان” قرار دیا جاتا ہے، کے ممکنہ خطرات کے پیش نظر سیکیورٹی فورسز ہائی الرٹ ہیں۔
بابر یوسفزئی کے مطابق،
“کالعدم تنظیموں کی کسی بھی مہم جوئی یا شرپسند کارروائی کا بھرپور اور فیصلہ کن جواب دیا جائے گا۔”
انہوں نے مزید کہا کہ سیکیورٹی اداروں نے کسی بھی ناخوشگوار صورتحال سے نمٹنے اور عوام کے تحفظ کو یقینی بنانے کے لیے تمام ضروری تیاریاں مکمل کر لی ہیں۔