نیویارک: معروف غزل اور لوک گلوکارہ طاہرہ سید نے اپنے انتقال سے متعلق سوشل میڈیا پر گردش کرنے والی خبروں کی سختی سے تردید کرتے ہوئے کہا ہے کہ وہ مکمل طور پر خیریت سے ہیں۔سوشل میڈیا پر پھیلنے والی افواہوں کے بعد طاہرہ سید نے ویڈیو پیغام جاری کرتے ہوئے اپنی صحت کے حوالے سے وضاحت پیش کی۔ انہوں نے کہا کہ ان کے انتقال اور ناسازیٔ صحت سے متعلق تمام خبریں بے بنیاد اور حقیقت کے منافی ہیں۔گلوکارہ کا کہنا تھا کہ انہیں معلوم ہوا ہے کہ ان کی صحت کے بارے میں مختلف افواہیں گردش کر رہی ہیں، تاہم اللہ کے فضل و کرم سے وہ بالکل صحت مند ہیں اور نیویارک میں اپنی زندگی خوش اسلوبی سے گزار رہی ہیں۔انہوں نے اپنے مداحوں اور چاہنے والوں کی دعاؤں، محبت اور خیرسگالی پر شکریہ ادا کرتے ہوئے عوام سے اپیل کی کہ غیر مصدقہ خبروں پر یقین نہ کریں اور غلط معلومات کو آگے پھیلانے سے گریز کریں۔طاہرہ سید نے ان تمام افراد کا بھی شکریہ ادا کیا جنہوں نے افواہوں کے بعد ان کی خیریت دریافت کرنے کے لیے رابطہ کیا۔دوسری جانب معروف فیشن ڈیزائنر حسن شہریار یاسین نے گلوکارہ کی تازہ تصویر شیئر کرتے ہوئے ان کی خیریت کی تصدیق کی، جبکہ سینئر اداکارہ بشریٰ انصاری نے بھی طاہرہ سید کا وضاحتی ویڈیو پیغام اپنے سماجی رابطوں کے صفحات پر شیئر کیا۔واضح رہے کہ گزشتہ چند روز کے دوران سوشل میڈیا پر طاہرہ سید کے انتقال سے متعلق جھوٹی خبریں گردش کر رہی تھیں، جس کے باعث ان کے مداحوں میں تشویش پھیل گئی تھی۔
