ممبئی( شو بز ڈیسک)بالی ووڈ سپر اسٹار سلمان خان کی سابقہ دوست سومی علی نے فلم ’’کالا ہرن‘‘ کے پروڈیوسر امیت جانی کی حمایت کرتے ہوئے اظہارِ رائے کی آزادی کے حق میں بیان دیا ہے۔امیت جانی نے دعویٰ کیا ہے کہ سلمان خان کے نمائندوں کی جانب سے قانونی نوٹس موصول ہونے کے بعد انہیں جان سے مارنے کی دھمکیاں بھی دی جا رہی ہیں۔ ان کا کہنا ہے کہ اس معاملے میں انہیں سومی علی کی حمایت حاصل ہوئی ہے۔سومی علی نے امیت جانی کی سوشل میڈیا پوسٹ پر تبصرہ کرتے ہوئے لکھا کہ ہر شخص کو کسی بھی موضوع پر فلم بنانے کا حق حاصل ہے۔ انہوں نے مزید کہا کہ صرف وہی لوگ چھپتے ہیں یا دوسروں کو دھمکیاں دیتے ہیں جو خود کو قصوروار سمجھتے ہیں۔واضح رہے کہ سلمان خان کے نمائندوں نے فلم ’’کالا ہرن‘‘ کے سازندوں کو قانونی نوٹس بھیجا ہے۔ یہ فلم 1998 کے معروف کالا ہرن شکار مقدمے سے متاثر بتائی جاتی ہے۔قانونی نوٹس میں مؤقف اختیار کیا گیا ہے کہ فلم میں سلمان خان کی شخصی حقوق اور نجی حیثیت کی سنگین خلاف ورزی کی گئی ہے، جس پر اعتراض اٹھایا گیا ہے۔
