کوئٹہ:* وزیراعظم محمد شہباز شریف نے بلوچستان کے رخشان ڈویژن میں معدنی وسائل کے تحفظ اور سرمایہ کاروں کے اعتماد کو یقینی بنانے کیلئے خصوصی سیکیورٹی کوریڈور قائم کرنے کی ہدایت جاری کر دی۔ اس مقصد کیلئے فرنٹیئر کور (ایف سی) کی فوری تعیناتی کی منظوری بھی دے دی گئی۔
یہ فیصلہ کوئٹہ میں نیشنل ایکشن پلان کے تحت منعقدہ صوبائی ایپکس کمیٹی اجلاس میں کیا گیا، جس میں چیف آف آرمی اسٹاف و چیف آف ڈیفنس اسٹاف فیلڈ مارشل سید عاصم منیر، وزیراعلیٰ بلوچستان میر سرفراز بگٹی، وفاقی وزراء اور اعلیٰ حکام نے شرکت کی۔
حکام کے مطابق سیکیورٹی کوریڈور میں اضافی ایف سی ونگز، شاہراہوں پر سیکیورٹی چیک پوسٹس، جدید سرویلنس گرڈ اور سرحدی نگرانی کے نظام شامل ہوں گے تاکہ معدنیات سے مالا مال علاقوں کی سیکیورٹی مزید مؤثر بنائی جا سکے۔
اجلاس سے خطاب کرتے ہوئے وزیراعظم شہباز شریف نے کہا کہ پاکستان قدرتی وسائل خصوصاً معدنیات سے مالامال ملک ہے، اور بلوچستان میں امن و امان برقرار رکھنا مقامی و بین الاقوامی سرمایہ کاروں کے اعتماد کیلئے ناگزیر ہے۔
وزیراعظم نے دہشتگردی کے خلاف اقدامات پر فیلڈ مارشل سید عاصم منیر اور پاک افواج کی خدمات کو سراہا جبکہ بلوچستان حکومت کی جانب سے انتظامی تعیناتیوں میں شفافیت اور میرٹ کے فروغ کی بھی تعریف کی۔
اجلاس کو بریفنگ میں بتایا گیا کہ دہشتگردی کے خاتمے کیلئے تمام ادارے متحرک ہیں جبکہ صوبے بھر میں نوجوانوں کیلئے اسکلز ڈویلپمنٹ اور فلاحی منصوبوں پر کام جاری ہے۔
حکام نے بتایا کہ نومبر 2024 سے اب تک بلوچستان میں پولیو کا کوئی کیس رپورٹ نہیں ہوا۔ اس کے علاوہ کینسر انسٹیٹیوٹ، ڈائلیسس سینٹرز اور ٹراما سینٹرز سمیت متعدد صحت منصوبے فعال ہو چکے ہیں۔
بریفنگ میں مزید بتایا گیا کہ بلوچستان کے 99 فیصد اسکول کھلے ہیں جبکہ شمسی توانائی منصوبے سے 15 ہزار سے زائد گھرانے مستفید ہوئے اور اب تک تقریباً 105 ارب روپے کی بچت ہوئی۔
وزیراعظم نے بلوچستان کے نوجوانوں کو قومی دھارے میں شامل کرنے کیلئے ڈیجیٹل اسکلز، اسکالرشپس اور فنی تربیت کے پروگرام مزید بڑھانے کے عزم کا اعادہ کیا۔
کوئٹہ کے دورے کے دوران وزیراعظم نے کمانڈ اینڈ اسٹاف کالج کا بھی دورہ کیا اور خطاب میں پاکستان کی خودمختاری اور سالمیت کے دفاع کے عزم کو دہرایا۔