شاہ رخ خان کے بیٹے آریان خان کی شادی میں جوتا چُرائی کی ویڈیو وائرل، صارفین محظوظ

ممبئی( شو بز ڈیسک)بالی ووڈ کے سپر اسٹار شاہ رخ خان کے صاحبزادے آریان خان ایک بار پھر خبروں کی زینت بن گئے ہیں، تاہم اس بار کسی فلم یا ہدایت کاری کی وجہ سے نہیں بلکہ ایک شادی کی تقریب میں ان کے منفرد اور مزاحیہ انداز کی ویڈیو سوشل میڈیا پر وائرل ہو گئی ہے۔یہ واقعہ ایک دوست کی شادی کے دوران پیش آیا جہاں آریان خان نے روایتی رسم جوتا چُرائی کو اس قدر سنجیدہ اور دلچسپ بنا دیا کہ دیکھنے والے اسے ایک مزاحیہ مقابلہ قرار دینے لگے۔شادی کے منتظمین کی جانب سے انسٹاگرام پر شیئر کی گئی ویڈیو میں آریان کو دلہے کے جوتے کے ساتھ ہر ممکن طریقے سے ڈٹے ہوئے دیکھا جا سکتا ہے۔ وہ توازن کھونے کے قریب پہنچ جاتے ہیں لیکن جوتا کسی کے حوالے نہیں کرتے۔ویڈیو میں آریان جینز، ٹی شرٹ اور براؤن جیکٹ میں نظر آتے ہیں اور پورے اعتماد کے ساتھ جوتا تھامے گھومتے دکھائی دیتے ہیں۔ دلہن والوں کی جانب سے جوتا چھیننے کی مسلسل کوششیں بھی جاری رہتی ہیں، تاہم آریان ہر بار اسے بچا لیتے ہیں اور ایک موقع پر تقریباً گرنے کے باوجود بھی جوتا نہیں چھوڑتے۔ویڈیو کے کیپشن میں مزاحیہ انداز میں لکھا گیا کہ جب دلہے کا بہترین دوست بالی ووڈ کا سپر اسٹار ہو تو جوتا چُرائی صرف رسم نہیں رہتی بلکہ ایک بڑا دلچسپ مقابلہ بن جاتی ہے۔ اسے چھوٹی سی جنگ بھی قرار دیا گیا۔سوشل میڈیا پر یہ ویڈیو تیزی سے وائرل ہو گئی ہے اور صارفین کی جانب سے مختلف دلچسپ تبصرے کیے جا رہے ہیں۔ کچھ صارفین نے حیرت کا اظہار کیا جبکہ کئی نے اسے محض تفریحی اور مزاحیہ لمحہ قرار دیتے ہوئے آریان کے انداز کو سراہا ہے۔