کراچی: معروف پاکستانی اداکارہ کنزہ ہاشمی نے انکشاف کیا ہے کہ انہیں ایک نہیں بلکہ متعدد خطرناک افراد کی جانب سے مسلسل تعاقب اور ہراسانی کا سامنا کرنا پڑا، جس کے باعث دوسروں پر اعتماد کرنا ان کے لیے مشکل ہو گیا۔حال ہی میں ایک انٹرویو کے دوران گفتگو کرتے ہوئے کنزہ ہاشمی نے بتایا کہ بیرونِ ملک مقیم ایک جنونی مداح نے ان کے گھر کے ملازمین سے رابطہ قائم کر لیا تھا اور انہیں مالی فائدہ دے کر اپنے ساتھ ملا لیا تھا۔اداکارہ کے مطابق گھر کا عملہ کئی برسوں سے ان کے ساتھ کام کر رہا تھا، تاہم بعد میں معلوم ہوا کہ وہ ان کے گھر کی نجی تصاویر، ذاتی استعمال کی اشیا اور دیگر ذاتی معلومات خفیہ طور پر اس شخص تک پہنچا رہے تھے۔کنزہ ہاشمی نے کہا کہ اس حقیقت کا علم ہونے پر انہیں شدید صدمہ پہنچا اور اس واقعے نے ان کے لیے لوگوں پر اعتماد کرنا بہت دشوار بنا دیا۔انہوں نے ایک اور واقعے کا ذکر کرتے ہوئے بتایا کہ ایک شخص ان کے ڈرامے کی شوٹنگ کے مقام تک پہنچ گیا تھا اور بعد ازاں ان کی رہائش گاہ تک بھی آ گیا، تاہم مکمل پتا معلوم نہ ہونے کے باعث وہ ان تک رسائی حاصل نہ کر سکا۔اداکارہ کے مطابق انہیں اس صورتحال سے نمٹنے کے لیے شوٹنگ کے مقام پر موجود عملے کی مدد لینا پڑی۔ ان کا کہنا تھا کہ ایسے واقعات متاثرہ فرد کے لیے نہایت پریشان کن ہوتے ہیں اور انسان خود کو بے بس محسوس کرنے لگتا ہے۔کنزہ ہاشمی نے مزید کہا کہ معروف شخصیات کو اکثر اس قسم کے مسائل کا سامنا رہتا ہے، لیکن کئی مواقع پر باقاعدہ شکایت درج کرانا یا قانونی کارروائی کرنا بھی آسان نہیں ہوتا۔
