ارمان ملک کا بیوی کے لباس پر تبصرہ، سوشل میڈیا پر نئی بحث چھڑ گئی

کراچی( شوبزڈیسک)معروف یوٹیوبر اور ریئلٹی شو کے سابق شریکِ مقابلہ ارمان ملک ایک بار پھر اپنے ایک بیان کے باعث سوشل میڈیا پر تنقید کی زد میں آ گئے ہیں۔اپنے حالیہ وی لاگ میں ارمان ملک نے اپنی پہلی اہلیہ پائل ملک کے لباس پر تبصرہ کیا، جس کے بعد صارفین کی جانب سے شدید ردِعمل سامنے آیا۔ویڈیو میں ارمان ملک نے پائل کے گھر میں ٹی شرٹ اور ہاف پینٹ پہننے پر ناراضی کا اظہار کیا۔ اس موقع پر پائل نے وضاحت کی کہ وہ صبح کے وقت بچے کی دیکھ بھال میں مصروف تھیں، تاہم ارمان نے گفتگو کے دوران کہا کہ اگر کوئی خاتون ہمیشہ اسی انداز میں رہے تو اس سے ازدواجی تعلقات متاثر ہو سکتے ہیں۔اس دوران ان کی دوسری اہلیہ کرتیکا ملک بھی موجود تھیں، جس کے باعث یہ گفتگو مزید توجہ کا مرکز بن گئی۔ارمان ملک کے بیان کے بعد سوشل میڈیا صارفین نے مختلف آرا کا اظہار کیا۔ متعدد افراد نے ان کے تبصرے کو نامناسب قرار دیتے ہوئے کہا کہ ازدواجی تعلقات کا دارومدار صرف ظاہری شکل یا لباس پر نہیں ہوتا، جبکہ بعض صارفین نے پائل ملک کے حق میں اظہارِ حمایت بھی کیا۔یہ پہلا موقع نہیں کہ ارمان ملک اپنی نجی زندگی یا بیانات کی وجہ سے خبروں میں آئے ہوں۔ اپنی غیر روایتی خاندانی زندگی کے باعث وہ اکثر سوشل میڈیا پر بحث و مباحثے کا موضوع بنے رہتے ہیں۔