ممبئی( شو بز ڈیسک)اداکار اور فلم ساز رتیش دیش مکھ نے سوشل میڈیا پر وائرل ہونے والی ایک ویڈیو سے جنم لینے والے تنازع پر اپنا مؤقف سامنے رکھ دیا ہے۔حال ہی میں ان کی نئی فلم ’’راجا شیواجی‘‘ کی کامیابی کے موقع پر منعقدہ جشن کی ایک ویڈیو سوشل میڈیا پر تیزی سے پھیلی، جس میں رتیش دیش مکھ کو چھترپتی شیواجی مہاراج کی تصویر والی قمیص پہنے خوشی کا اظہار کرتے دیکھا گیا۔ ویڈیو سامنے آنے کے بعد بعض حلقوں کی جانب سے تنقید کی گئی اور مختلف قیاس آرائیاں بھی گردش کرنے لگیں۔اس صورتحال پر ردعمل دیتے ہوئے رتیش دیش مکھ نے اپنے سماجی رابطے کے صفحے پر تفصیلی وضاحت جاری کی۔ انہوں نے کہا کہ ان کے دل میں شیواجی مہاراج کے لیے بے حد احترام اور عقیدت موجود ہے اور ان کا کسی بھی صورت میں بے ادبی کا کوئی ارادہ نہیں تھا۔انہوں نے بتایا کہ مذکورہ قمیص فلم کی تشہیری مہم کا حصہ تھی اور جشن کے دوران اسی لباس میں موجود تھے۔ ان کے مطابق وائرل ویڈیو کو غلط انداز میں پیش کیا گیا، جس سے غیر ضروری تنازع نے جنم لیا۔رتیش دیش مکھ نے ان افواہوں کو بھی مسترد کر دیا جن میں دعویٰ کیا جا رہا تھا کہ وہ تقریب کے دوران نشے کی حالت میں تھے۔ انہوں نے واضح الفاظ میں کہا کہ انہوں نے اپنی زندگی میں کبھی شراب استعمال نہیں کی اور ان سے متعلق پھیلائی جانے والی ایسی باتوں میں کوئی صداقت نہیں۔اپنے بیان میں انہوں نے مزید کہا کہ فلم کو شائقین کی جانب سے ملنے والی غیر معمولی پذیرائی پر پوری ٹیم نے ایک مختصر تقریب کا اہتمام کیا تھا، جس کی ایک جھلک بعد ازاں سوشل میڈیا پر وائرل ہو گئی۔ ان کا کہنا تھا کہ وہ عوامی جذبات کا احترام کرتے ہیں اور اگر کسی کی دل آزاری ہوئی ہو تو اس پر افسوس ہے، تاہم ان کی نیت ہرگز توہین آمیز نہیں تھی۔رتیش دیش مکھ کے مطابق شیواجی مہاراج کی شخصیت ان کے لیے قابلِ احترام ہے اور وہ ہمیشہ ان کے کردار اور خدمات کو قدر کی نگاہ سے دیکھتے ہیں۔
