کوئٹہ — قومی اسمبلی میں اپوزیشن لیڈر اور محمود خان اچکزئی نے اپنے خلاف درج مقدمے کو غیر آئینی قرار دیتے ہوئے بلوچستان ہائی کورٹ سے رجوع کر لیا ہے۔
تفصیلات کے مطابق یہ آئینی درخواست پشتونخوا ملی عوامی پارٹی کے لیگل فورم کی جانب سے دائر کی گئی، جس میں موقف اختیار کیا گیا ہے کہ ان کے خلاف درج ایف آئی آر غیر قانونی، غیر آئینی اور بنیادی انسانی حقوق کی خلاف ورزی پر مبنی ہے۔
درخواست میں عدالت سے استدعا کی گئی ہے کہ اس مقدمے کو فوری طور پر کالعدم قرار دیا جائے اور ایف آئی آر کو خارج کیا جائے۔
پی کے میپ کے وکلا فورم کے مطابق مقدمہ سیاسی بنیادوں پر بنایا گیا ہے اور اس میں کوئی قانونی جواز موجود نہیں۔
ذرائع کے مطابق محمود خان اچکزئی کی بلوچستان ہائی کورٹ آمد کے موقع پر وکلا، پارٹی رہنماؤں اور کارکنان کی بڑی تعداد موجود تھی، جبکہ عدالت کے اطراف سکیورٹی کے سخت انتظامات بھی کیے گئے تھے۔