ممبئی( شو بز ڈیسک)بھارتی فلمی دنیا کی معروف اداکارہ تاپسی پنو نے خواتین فنکاروں کے ساتھ عمر کی بنیاد پر ہونے والے امتیازی رویوں پر تشویش کا اظہار کیا ہے۔ ان کا کہنا ہے کہ تیس برس کی عمر کے بعد اداکاراؤں کے لیے معیاری اور نمایاں کردار حاصل کرنا پہلے کے مقابلے میں زیادہ مشکل ہو جاتا ہے۔اپنی نئی فلم ’’گاندھاری‘‘ کی نمائش سے قبل ایک گفتگو میں تاپسی پنو نے بتایا کہ انہوں نے تقریباً پچیس برس کی عمر میں ہندی فلمی دنیا میں قدم رکھا۔ ان کے مطابق کسی اداکارہ کو اپنی صلاحیت منوانے اور پہچان بنانے میں کئی سال لگ جاتے ہیں، لیکن جب وہ اس مقام تک پہنچتی ہے تو عمر کو بنیاد بنا کر اس کے لیے کرداروں کے انتخاب کو محدود کر دیا جاتا ہے۔تاپسی پنو نے کہا کہ فلمی دنیا میں ایسے بے شمار کردار موجود ہیں جن کے لیے کم عمر اداکارہ ضروری نہیں ہوتی، تاہم اس کے باوجود زیادہ تر نوجوان چہروں کو ترجیح دی جاتی ہے۔ انہوں نے اس بات پر بھی زور دیا کہ مرد فنکاروں کے ساتھ عموماً ایسا رویہ دیکھنے میں نہیں آتا اور انہیں عمر بڑھنے کے باوجود مرکزی کردار ملتے رہتے ہیں۔
