آن لائن جوئے کی ایپ پروموشن کیس، یوٹیوبر اقرء کنول اور شوہر کی عبوری ضمانت میں توسیع

لاہور( شو بز ڈیسک)سیشن کورٹ میں آن لائن جوا ایپ کی تشہیر کے مقدمے میں یوٹیوبر اقرء کنول اور ان کے شوہر اریب کی عبوری ضمانت پر سماعت ہوئی۔عدالت نے آئندہ سماعت پر نیشنل سائبر کرائم انویسٹی گیشن ایجنسی سے مکمل ریکارڈ طلب کرتے ہوئے کیس کی مزید سماعت چودہ مئی تک ملتوی کر دی۔ایڈیشنل سیشن جج ذوالفقار احمد نعیم نے عبوری ضمانتوں کی درخواستوں پر سماعت کی۔ دوران سماعت عدالت نے متعلقہ ادارے سے کیس کا ریکارڈ پیش کرنے کی ہدایت جاری کی۔سماعت کے دوران ملزمان کی جانب سے وکیل چوہدری سلیم پیش ہوئے جبکہ اقرء کنول اور ان کے شوہر نے عدالت میں حاضر ہو کر اپنی حاضری مکمل کرائی۔یاد رہے کہ نیشنل سائبر کرائم انویسٹی گیشن ایجنسی کی جانب سے ملزمان کے خلاف آن لائن جوئے کی ایپ کی تشہیر کے الزام میں مقدمہ درج کیا گیا ہے۔