کراچی( شوبز ڈیسک)پاکستان کی معروف اداکارہ ماہرہ خان نے کوئٹہ میں خاتون ڈاکٹر پر تیزاب پھینکے جانے کے واقعے کی شدید مذمت کرتے ہوئے اسے انتہائی سفاک اور ناقابلِ برداشت عمل قرار دیا ہے۔سماجی رابطے کے ذریعے اپنے ردِعمل میں ماہرہ خان نے کہا کہ ایک خاتون لوگوں کی جانیں بچانے کے لیے اپنے فرائض انجام دے رہی تھی، لیکن اسے ایک ایسے حملے کا نشانہ بنایا گیا جس کا تصور بھی لرزا دینے والا ہے۔ ان کے مطابق ڈاکٹر ماہ نور ناصر پر اسپتال کے اندر حملہ کیا جانا نہایت افسوسناک اور انسانیت سوز واقعہ ہے۔اداکارہ نے کہا کہ وہ اس خبر پر شدید غم اور غصے کا شکار ہیں۔ ان کا کہنا تھا کہ ہر خاتون کو تحفظ اور عزت کے ساتھ کام کرنے کا حق حاصل ہے، جبکہ حملہ آور نے ایک ایسے جرم کا ارتکاب کیا جس کے نتائج متاثرہ ڈاکٹر کی زندگی پر گہرے اثرات مرتب کر سکتے ہیں۔ماہرہ خان نے اس موقع پر معاشرے کے تمام طبقات، خصوصاً مردوں اور خواتین، سے مطالبہ کیا کہ وہ اس طرح کے واقعات کے خلاف متحد ہو کر آواز بلند کریں اور تشدد کے ہر روپ کی مذمت کریں۔یاد رہے کہ کوئٹہ کے ایک سرکاری اسپتال میں پیش آنے والے اس واقعے میں خاتون ڈاکٹر تیزاب گردی کا نشانہ بنیں، جس کے باعث وہ شدید زخمی ہو گئیں۔
