بلوچستان کے علاقے چمالنگ میں انٹیلیجنس بیسڈ آپریشن کے دوران جرات و بہادری کی مثال قائم کرتے ہوئے جامِ شہادت نوش کرنے والے میجر توصیف احمد بھٹی اور چار دیگر جوانوں کی نمازِ جنازہ لورالائی میں ادا کر دی گئی۔
اعلیٰ حکام کی شرکت
نمازِ جنازہ میں جی او سی 41 ڈویژن میجر جنرل ممتاز علی، آئی جی ایف سی بلوچستان (نارتھ) میجر جنرل محمد عاطف مجتبٰی اور دیگر اعلیٰ سول و عسکری حکام نے شرکت کی۔ اس موقع پر شہداء کو شاندار خراجِ عقیدت پیش کیا گیا اور ان کی قربانیوں کو ملک کے امن و استحکام کے لیے مشعلِ راہ قرار دیا گیا۔
آخری رسومات اور فوجی اعزاز
نمازِ جنازہ کی ادائیگی کے بعد شہداء کے جسدِ خاکی ان کے آبائی علاقوں کی جانب روانہ کر دیے گئے ہیں۔ مادرِ وطن کے ان بہادر بیٹوں کی تدفین ان کے آبائی علاقوں میں مکمل فوجی اعزاز کے ساتھ کی جائے گی، جہاں انہیں گارڈ آف آنر پیش کیا جائے گا۔
یاد رہے کہ میجر توصیف اور ان کے ساتھیوں نے چمالنگ کے دشوار گزار راستوں میں دہشت گردوں کے خلاف لڑتے ہوئے ملک کے دفاع کے لیے اپنی جانوں کا نذرانہ پیش کیا، جس پر پوری قوم ان کی مقروض اور فخر مند ہے۔