لاہور: ممتاز دانشور، سینئر صحافی، معروف کالم نگار اور ماہنامہ اردو ڈائجسٹ کے چیف ایڈیٹر الطاف حسن قریشی کو اتوار کے روز لاہور میں سپردِ خاک کر دیا گیا۔ ان کی نمازِ جنازہ اور تدفین میں سیاسی، سماجی، مذہبی اور صحافتی حلقوں سے تعلق رکھنے والی بڑی تعداد نے شرکت کی۔
مرحوم کی نمازِ جنازہ نمازِ ظہر کے بعد لاہور کی تاریخی جامعہ اشرفیہ، فیروزپور روڈ میں ادا کی گئی، جہاں ہزاروں افراد نے پاکستان کی صحافت کی ایک عظیم شخصیت کو خراجِ عقیدت پیش کیا۔
نمازِ جنازہ میں وفاقی وزیر اطلاعات عطاء اللہ تارڑ، وفاقی وزیر منصوبہ بندی احسن اقبال، اسپیکر پنجاب اسمبلی ملک محمد احمد خان، سابق وفاقی وزیر خواجہ سعد رفیق، رکن قومی اسمبلی حافظ نعمان اور جماعت اسلامی کے رہنما فرید پراچہ سمیت مختلف سیاسی و سماجی شخصیات نے شرکت کی۔
تدفین کے بعد اسپیکر پنجاب اسمبلی ملک محمد احمد خان نے مرحوم کے اہلِ خانہ سے اظہارِ تعزیت کرتے ہوئے کہا کہ الطاف حسن قریشی نے قومی صحافت، فکری رہنمائی اور نظریاتی ادب کے لیے گراں قدر خدمات انجام دیں۔
انہوں نے کہا کہ مرحوم کی تحریریں، صحافتی دیانت داری اور فکری بصیرت آنے والی نسلوں کے صحافیوں کے لیے مشعلِ راہ رہیں گی۔
اس موقع پر مرحوم کے درجات کی بلندی اور اہلِ خانہ کے لیے صبرِ جمیل کی دعا بھی کی گئی۔