ممبئی( شو بز ڈیسک)معروف بالی ووڈ اداکارہ اور بھارتی رکنِ پارلیمنٹ کنگنا رناوت نے کہا ہے کہ فلموں میں خواتین کو طویل عرصے سے ایک مخصوص اور غیر متوازن انداز میں پیش کیا جاتا رہا ہے، تاہم اس مسئلے کو صرف سنیما تک محدود کرنا درست نہیں۔بھارتی میڈیا سے گفتگو کرتے ہوئے کنگنا رناوت نے تسلیم کیا کہ فلموں میں خواتین کی نمائندگی کے حوالے سے خدشات موجود ہیں اور اکثر ان کی تصویر کشی غیر منصفانہ انداز میں کی جاتی ہے۔ تاہم انہوں نے کہا کہ ہر منظر یا کردار کو الگ تھلگ دیکھ کر سوشل میڈیا پر غیر ضروری ردعمل دینا بھی مناسب نہیں۔انہوں نے کہا کہ خواتین کو صرف فلموں میں ہی نہیں بلکہ روزمرہ زندگی میں بھی اکثر ایک شے کے طور پر دیکھا جاتا ہے۔ ان کے مطابق عوامی مقامات، ٹرینوں، بسوں اور سڑکوں پر بھی خواتین کو ہراسانی اور نامناسب رویوں کا سامنا کرنا پڑتا ہے۔کنگنا رناوت کا کہنا تھا کہ اس لیے یہ تاثر درست نہیں کہ خواتین کے ساتھ غیر مناسب رویوں کا تعلق صرف فلمی دنیا سے ہے، بلکہ یہ ایک وسیع سماجی مسئلہ ہے جس کا اظہار مختلف شعبوں میں نظر آتا ہے۔اداکارہ نے اپنی سیاسی زندگی پر بھی بات کرتے ہوئے کہا کہ کبھی کبھار انہیں یہ فکر رہتی ہے کہ کہیں وہ ایک سیاست دان کے بجائے زیادہ اداکارہ تو دکھائی نہیں دیتیں، تاہم وہ اپنی دونوں ذمہ داریوں کو متوازن انداز میں نبھانے کی کوشش کرتی ہیں۔
