بھارتی اداکارہ دیویانکا سیروہی 30 سال کی عمر میں دل کا دورہ پڑنے سے انتقال کر گئیں

ممبئی( شو بز ڈیسک)ہریانہ سے تعلق رکھنے والی بھارتی اداکارہ دیویانکا سیروہی 30 سال کی عمر میں انتقال کر گئیں۔ ان کی اچانک وفات نے شوبز انڈسٹری کو گہرے صدمے سے دوچار کر دیا ہے۔بھارتی میڈیا رپورٹس کے مطابق دیویانکا سیروہی کو پیر کی رات اتر پردیش میں واقع اپنے گھر میں اچانک دل کا دورہ پڑا۔ اہل خانہ انہیں فوری طور پر قریبی اسپتال لے گئے تاہم ڈاکٹروں نے پہنچنے پر ان کی موت کی تصدیق کر دی۔ان کی اچانک وفات پر مختلف فنکاروں نے سوشل میڈیا پر افسوس اور تعزیت کا اظہار کیا ہے، تاہم اہل خانہ کی جانب سے تاحال کوئی باضابطہ بیان جاری نہیں کیا گیا۔دیویانکا سیروہی کا تعلق اتر پردیش سے تھا اور وہ اس وقت غازی آباد میں اپنے والدین اور دادی کے ساتھ رہائش پذیر تھیں۔ انہوں نے علاقائی انٹرٹینمنٹ انڈسٹری میں اپنی شناخت بنائی اور گلوکار معصوم شرما کے ساتھ متعدد میوزک ویڈیوز میں کام کیا۔وہ سوشل میڈیا پر بھی خاصی مقبول تھیں اور ان کے انسٹاگرام پر فالوورز کی تعداد تیرہ لاکھ سے زائد تھی۔ انہوں نے اپنے کیریئر کا آغاز مختصر ویڈیو پلیٹ فارم سے کیا تھا جہاں ایک وائرل ویڈیو کے بعد انہیں شہرت حاصل ہوئی۔