آئندہ کبھی ساتھ کام نہیں کروں گی:شائستہ جبین کی فردوس جمال پر تنقید

 لاہور( شو بز ڈیسک)پاکستان شوبز انڈسٹری کی سینئر اداکارہ شائستہ جبین نے سینئر اداکار فردوس جمال کے خواتین سے متعلق رویے پر کھل کر تنقید کرتے ہوئے کہا ہے کہ وہ آئندہ کبھی ان کے ساتھ کام نہیں کریں گی۔ایک نجی ٹی وی کے مارننگ شو میں گفتگو کرتے ہوئے شائستہ جبین نے کہا کہ انسان کی انا، فطرت اور تربیت ہی اسے بناتی یا بگاڑتی ہے۔ ان کے مطابق فردوس جمال بلاشبہ ایک بہترین اداکار ہیں، لیکن اگر انسان اچھا نہ ہو تو اس کی کامیابی بے معنی ہو جاتی ہے۔اداکارہ نے کہا کہ انہوں نے صرف ایک بار فردوس جمال کے ساتھ کام کیا اور وہ تجربہ ہی ان کے لیے کافی تھا۔ شائستہ جبین کے مطابق فردوس جمال خواتین کے بارے میں نامناسب گفتگو کرتے ہیں اور وہ ایسی باتیں سننا بھی پسند نہیں کرتیں۔انہوں نے مزید کہا کہ فردوس جمال ماضی میں کئی سینئر فنکاروں کے خلاف بھی گفتگو کر چکے ہیں، حالانکہ وہ فنکار اپنے کام اور نام کی وجہ سے ہمیشہ یاد رکھے جائیں گے اور کسی کے بیان سے ان کا مقام کم نہیں ہو سکتا۔