وزارتِ صحت کے ترجمان کے مطابق مصطفیٰ کمال اس اہم عالمی اجلاس میں پاکستانی وفد کی قیادت کریں گے، جہاں وہ پاکستان کے قومی صحت کے اہداف، جاری اصلاحات اور صحت کے شعبے میں حکومتی اقدامات کو عالمی برادری کے سامنے پیش کریں گے۔
ترجمان نے کہا کہ پاکستان اپنے قومی صحت کے نظام کو عالمی معیار کے مطابق بنانے کے لیے پُرعزم ہے، جبکہ مضبوط طبی ڈھانچے اور عوام کو مساوی طبی سہولیات کی فراہمی پر خصوصی توجہ دی جا رہی ہے۔
ورلڈ ہیلتھ آرگنائزیشن (WHO) کے زیر اہتمام یہ عالمی اجلاس 18 مئی سے 23 مئی 2026 تک جاری رہے گا، جس میں دنیا بھر کے رکن ممالک عالمی صحت پالیسیوں، بجٹ اور ترجیحات پر تبادلہ خیال کریں گے۔
وفاقی وزیر مصطفیٰ کمال اجلاس کے دوران پاکستان کا مؤقف مختلف اہم شعبوں میں پیش کریں گے، جن میں یونیورسل ہیلتھ کوریج، ڈیجیٹل ہیلتھ انفراسٹرکچر، وبائی امراض سے نمٹنے کی تیاری اور عالمی صحت کے چیلنجز شامل ہیں۔
اس موقع پر مصطفیٰ کمال مختلف ممالک کے وزرائے صحت اور بین الاقوامی اداروں کے سربراہان سے ملاقاتیں بھی کریں گے تاکہ صحت کے شعبے میں باہمی تعاون کو مزید فروغ دیا جا سکے۔