ایف آئی اے چمن کی حوالہ ہنڈی نیٹ ورک کے خلاف بڑی کارروائی
چمن: Federal Investigation Agency بلوچستان زون نے سرحدی علاقوں میں سرگرم غیر قانونی حوالہ ہنڈی اور غیر مجاز کرنسی ایکسچینج نیٹ ورکس کے خلاف کارروائیوں میں اہم کامیابی حاصل کر لی۔
ایف آئی اے حکام کے مطابق یہ کارروائیاں ڈائریکٹر ایف آئی اے بلوچستان زون محمد بہرام خان کی خصوصی ہدایات پر عمل میں لائی گئیں۔
FIA Chaman نے مختلف مقامات پر کامیاب چھاپے مارے اور فارن ایکسچینج ریگولیشن ایکٹ (FERA) 1947 ترمیمی 2020 کی دفعات 8 اور 23 کے تحت متعدد مقدمات درج کیے، جبکہ فارنرز ایکٹ 1946 کی دفعات بھی شامل کی گئیں۔
حکام کے مطابق غیر قانونی حوالہ ہنڈی کاروبار اور غیر مجاز فارن ایکسچینج سرگرمیوں میں ملوث افراد کو گرفتار کر کے ڈسٹرکٹ اینڈ سیشن جج چمن کی عدالت میں پیش کیا گیا۔
تحقیقات انسپکٹر محمد ادریس خان نے اسسٹنٹ ڈائریکٹر ندیم غفار کی نگرانی میں مکمل کیں، جس کے نتیجے میں چھ مختلف مقدمات میں سزائیں سنائی گئیں۔
ایف آئی اے حکام نے بتایا کہ غیر قانونی حوالہ ہنڈی نیٹ ورک سے وابستہ کئی ملزمان کو سزا دی گئی جبکہ غیر قانونی مالی سرگرمیوں میں ملوث غیر ملکی شہریوں کو افغانستان ڈی پورٹ کر دیا گیا۔
کارروائیوں کے دوران 18 لاکھ روپے سرکاری خزانے میں جمع کرائے گئے، جبکہ عدالتوں نے جرمانے بھی عائد کیے اور بعض ملزمان کو زیرِ حراست مدت کے برابر سزا سنائی۔
ایف آئی اے بلوچستان کے مطابق یہ کامیاب کارروائیاں قومی معیشت کے تحفظ کے لیے غیر قانونی کرنسی ایکسچینج، حوالہ ہنڈی نیٹ ورکس اور سرحد پار مالی جرائم کے خاتمے کے عزم کا مظہر ہیں۔
ڈائریکٹر ایف آئی اے بلوچستان محمد بہرام خان نے ایف آئی اے چمن کے افسران کی کارکردگی کو سراہتے ہوئے کہا کہ معاشی جرائم کے خلاف بلاامتیاز قانونی کارروائیاں جاری رہیں گی۔