یورپی یونین نے یوکرین کے لیے 90 ارب یورو قرض اور روس پر 20واں پابندی پیکج منظور کر لیا

برسلز( مانیٹرنگ ڈیسک)برسلز میں یورپی یونین نے یوکرین کے لیے 90 ارب یورو کے قرض اور روس کے خلاف پابندیوں کے بیسویں پیکج کی باضابطہ منظوری دے دی ہے۔یورپی حکام کے مطابق دونوں فیصلوں کو ابتدائی طور پر بعض رکن ممالک کی جانب سے روکا گیا تھا، تاہم بعد ازاں سفیروں کی سطح پر اتفاق رائے پیدا ہونے کے بعد تحریری طریقہ کار کے ذریعے انہیں حتمی شکل دے دی گئی۔رپورٹ کے مطابق کسی رکن ملک نے آخری مرحلے میں اعتراض نہیں کیا، جس کے بعد قرض اور پابندیوں کے دونوں پیکج متفقہ طور پر منظور ہو گئے۔منظور شدہ مالیاتی منصوبے کے تحت یورپی یونین 2026 اور 2027 میں یوکرین کو دفاعی اور بجٹ ضروریات کے لیے مجموعی طور پر 45 ارب یورو فراہم کرے گی، جبکہ 90 ارب یورو کے قرض کے ذریعے ابتدائی مالی معاونت بھی کی جائے گی۔یورپی یونین کی قیادت نے اس فیصلے کو خطے کی صورتحال کے تناظر میں اہم پیش رفت قرار دیا ہے۔