ممبئی( شو بز ڈیسک)بھارت کے عالمی شہرت یافتہ پنجابی گلوکار اور اداکار دلجیت دوسانجھ نے اپنے کینیڈا ٹور کے دوران پیش آنے والے سیاسی تنازعات اور خالصتان سے متعلق نعروں پر پہلی بار کھل کر ردعمل دیتے ہوئے کہا ہے کہ وہ جہاں بھی جاتے ہیں مختلف الزامات کا سامنا کرتے ہیں۔اپنے اوورا ورلڈ ٹور کے دوران شمالی امریکا کے مختلف شہروں میں پرفارم کرنے والے دلجیت دوسانجھ کو ایک جانب مداحوں کی بھرپور پذیرائی مل رہی ہے، جبکہ دوسری جانب انہیں سیاسی اور سماجی حلقوں کی تنقید کا بھی سامنا ہے۔کینیڈا میں ایک بڑے کنسرٹ کے دوران ہزاروں مداحوں سے خطاب کرتے ہوئے انہوں نے کہا کہ ان پر مختلف نوعیت کے الزامات لگائے جاتے ہیں، اور بعض اوقات وہ خود بھی اس صورتحال کو سمجھنے سے قاصر ہوتے ہیں کہ وہ کس ماحول کا سامنا کر رہے ہیں۔دلجیت نے کہا کہ وہ اپنے سفر کو محبت، ثقافت اور فن کے ذریعے جاری رکھنا چاہتے ہیں۔ کنسرٹ کے دوران اس وقت ماحول مزید پرجوش ہوگیا جب مداحوں نے ’’پنجابی آ گئے اوئے‘‘ کے نعرے لگائے، جس پر انہوں نے مسکراتے ہوئے نوجوانوں کے جذبے کو سراہا۔اس سے قبل بھی کیلگری میں ان کے کنسرٹ کے دوران خالصتان کے حامیوں کے احتجاج کے باعث شو عارضی طور پر روکنا پڑا تھا۔دلجیت دوسانجھ آئندہ امریکا کے مختلف شہروں میں بھی پرفارم کریں گے، جبکہ فلمی میدان میں وہ ہدایتکار امتیاز علی کی نئی فلم’’واپس آؤں گا‘‘ میں بھی جلوہ گر ہوں گے، جس میں نصیر الدین شاہ سمیت دیگر اداکار شامل ہیں اور موسیقی اے آر رحمان نے ترتیب دی ہے۔ یہ فلم 12 جون 2026 کو ریلیز کی جائے گی۔
