رشتے کے خاتمے پر مکمل رابطہ منقطع کرنا ضروری ہے، اداکارہ کالکی کیکلاں کی گفتگو

ممبئی( شو بز ڈیسک)بھارتی اداکارہ کالکی کیکلاں نے ہدایت کار انوراگ کشیپ سے اپنی طلاق کے حوالے سے پہلی مرتبہ کھل کر گفتگو کی ہے۔ایک انٹرویو میں کالکی کیکلاں نے کہا کہ صرف علاج یا مشاورت کافی نہیں ہوتی، بلکہ جب کوئی مضبوط اور طویل رشتہ ٹوٹ جائے اور دونوں فریق ایک دوسرے کو تکلیف دے چکے ہوں تو کچھ عرصے کے لیے مکمل رابطہ ختم کرنا ضروری ہوتا ہے۔انہوں نے کہا کہ مشکل وقت میں انسان کو پہلے اپنے جذبات کو سمجھنے اور محسوس کرنے کی ضرورت ہوتی ہے جبکہ علاج یا مشاورت طویل مدت میں مدد فراہم کرتی ہے۔اداکارہ کے مطابق اگر کسی کے ساتھ طویل عرصے تک تعلق رہا ہو تو علیحدگی کے بعد مناسب وقت تک فاصلہ رکھنا بہتر ہوتا ہے تاکہ ذہنی سکون حاصل کیا جا سکے۔کالکی کیکلاں نے مزید کہا کہ غصہ، دکھ اور تکلیف کو قریبی دوستوں یا اہل خانہ کے ساتھ بانٹنا زیادہ بہتر ہے، بجائے اس کے کہ اسی شخص سے بات کی جائے جس نے تکلیف پہنچائی ہو۔انہوں نے یہ بھی کہا کہ جب ماضی کی اچھی یادیں دوبارہ ذہن میں آنے لگیں تو یہ اس بات کی علامت ہو سکتی ہے کہ انسان دوبارہ تعلق کے بارے میں سوچنے لگتا ہے۔